Home Blog
ເອກອັກຄະລັດຖະທູດລາວ ຍື່ນສານຕາຕັ້ງຕໍ່ຜູ້ສຳເລັດຣາຊະການ ແຫ່ງ ການາດາ
Lao Ambassador has presented Credentials to Governor General of Canada
Click here for more pictures
PO 2 Louis Dubé, Rideau Hall © OSGG, 2026
PO 2 Louis Dubé, Rideau Hall © OSGG, 2026
ໃນຕອນບ່າຍຂອງວັນທີ 22 ມັງກອນ 2026, ທີ່ທໍານຽບຜູ້ສໍາເລັດຣາຊະການ (Rideau Hall), ນະຄອນຫຼວງໂອຕາວາ, ປະເທດການາດາ, ທ່ານ ພູໂຂງ ສີສຸລາດ ໄດ້ຍື່ນສານຕາຕັ້ງຂອງພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຕໍ່ພະນະທ່ານ ນາງ ແມຣີ ໄຊມອນ (Mary Simon), ຜູ້ສໍາເລັດຣາຊະການ ແລະ ຜູ້ບັນຊາການທະຫານສູງສຸດ ແຫ່ງ ການາດາ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳການາດາ, ເຊິ່ງມີສຳນັກງານສະຖານທູດຕັ້ງຢູ່ນະຄອນຫຼວງວໍຊິງຕັນ, ດີຊີ, ສ.ອາເມລິກາ.
ໃນໂອກາດດັ່ງກ່າວ, ທ່ານເອກອັກຄະລັດຖະທູດລາວ ໄດ້ສົ່ງຄໍາຢື້ຢາມຖາມຂ່າວອັນອົບອຸ່ນຂອງ ພະນະທ່ານ ທອງລຸນ ສີສຸລິດປະທານປະເທດ ແຫ່ງ ສປປ ລາວ ເຖິງ ພະນະທ່ານ ນາງ ແມຣີ ໄຊມອນ ແລະ ຜ່ານຜູ້ສໍາເລັດຣາດຊະການ ໄປຍັງລັດຖະບານ ແລະ ປະຊາຊົນການາດາ. ພະນະທ່ານຜູ້ສໍາເລັດຣາຊະການ ແຫ່ງ ການາດາ ໄດ້ສະແດງຄວາມຂອບໃຈໄປຍັງພະນະທ່ານປະທານປະເທດ ແຫ່ງ ສປປ ລາວ ແລະ ໄດ້ສະແດງຄວາມຍິນດີຊົມເຊີຍຕໍ່ການມາຮັບຫນ້າທີ່ ຂອງທ່ານເອກະອັກຄະລັດຖະທູດລາວຄົນໃຫມ່ ປະຈໍາ ການາດາ ພ້ອມທັງໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງການາດາ-ລາວ, ການຮ່ວມມື ແລະ ສະຫນັບສະຫນູນເຊິ່ງກັນ ແລະ ກັນ ໃນເວທີຫລາຍຝ່າຍໃນໄລຍະຜ່ານມາ. ທ່ານທູດລາວ ໄດ້ສະແດງຄວາມຂອບໃຈຕໍ່ພະນະທ່ານຜູ້ສໍາເລັດຣາຊະການ ແຫ່ງ ການາດາ ກໍຄື ຕໍ່ທາງການການາດາ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ຢືນຢັນຄວາມຫມາຍຫມັ້ນທີ່ຈະປະຕິບັດຫນ້າທີ່ຂອງຕົນຢ່າງຕັ້ງຫນ້າເພື່ອຊຸກຍູ້, ສົ່ງເສີມ ແລະ ເສີມຂະຫຍາຍສາຍພົວພັນມິດຕະພາບ ແລະ ຮ່ວມມືອັນດີ ລະຫວ່າງ ສປປ ລາວ ແລະ ການາດາ ໃຫ້ມີບາດກ້າວຂະຫຍາຍຕົວຂຶ້ນໄປເລື້ອຍໆ, ສປປ ລາວ ໃນຖານະເປັນປະເທດປະສານງານອາຊຽນ-ການາດາ ຈະສືບຕໍ່ປະກອບສ່ວນຢ່າງຫ້າວຫັນເພື່ອຮັດແຫນ້ນການເປັນຄູ່ຮ່ວມມືຍຸດທະສາດ ອາຊຽນ-ການາດາ ລວມທັງການເຈລະຈາຮ່າງສັນຍາການຄ້າເສລີອາຊຽນ-ການາດາ (ACAFTA) ໃຫ້ສໍາເລັດຕາມທີ່ສອງຝ່າຍໄດ້ຄາດຫມາຍໄວ້.
ໃນໂອກາດໄປຍື່ນສານຕາຕັ້ງຕໍ່ຜູ້ສໍາເລັດຣາຊະການ ແຫ່ງ ການາດາ, ໃນວັນ 23 ມັງກອນ 2026 ທ່ານ ພູໂຂງ ສີສຸລາດ
ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປປ ລາວ ປະຈໍາ ການາດາ ກໍໄດ້ເຄື່ອນໄຫວພົບປະສອງຝ່າຍກັບເຈົ້າຫນ້າທີ່ທີ່ກ່ຽວຂ້ອງຂອງການາດາ ລວມມີ ທ່ານ ອາລັນ ບາວແມນ (Alan Bowman), ຫົວໜ້າກົມອາຊີຕາເວັນອອກສ່ຽງໃຕ້ ແລະ ໂອຊີອານີ; ທ່ານ ນ. ແມຣີ ຄາເທີຣິນ ສະເປັຍສ໌ (Mary-Catherine Speirs), ຫົວຫນ້າກົມເຈລະຈາການຄ້າ; ທ່ານ ນ. ຢູດິດ ເຢລບແມນ (Judith Gelbman), ຫົວຫນ້າພະແນກແຜນງານຫລາຍຝ່າຍ ແລະ ພາກພື້ນ; ແລະ ທ່ານ ຕີໂມທີ ແອດເວີດສ໌ (Timothy Edwards), ຫົວຫນ້າພະແນກຫລຸດຜ່ອນໄພຂົ່ມຂູ່ຈາກອາວຸດ, ກະຊວງວຽກງານສາກົນການາດາ (Global Affairs Canada). ໃນການພົບປະ, ທັງສອງຝ່າຍໄດ້ສົນທະນາແລກປ່ຽນຢ່າງກົງໄປກົງມາ ເພື່ອແນໃສ່ສືບຕໍ່ເສີມຂະຫຍາຍມິດຕະພາບ ແລະ ການຮ່ວມມືລາວ-ການາດາໃນດ້ານຕ່າງໆ ລວມທັງກົນໄກປຶກສາຫາລືທາງດ້ານການເມືອງ ( Political Consultation), ການຮ່ວມມືໃນຂົງເຂດການຄ້າ, ການລົງທຶນ, ການທ່ອງທ່ຽວ, ການທູດປະຊາຊົນ, ທຶນການສຶກສາ ລວມທັງການສົ່ງເສີມການສຶກສາ ແລະ ນໍາໃຊ້ພາສາຝຣັ່ງ ຢູ່ ສປປ ລາວ; ພ້ອມກັນນັ້ນ, ທັງສອງຝ່າຍ ຍັງໄດ້ແລກປ່ຽນທັດສະນະຮ່ວມກັນໃນການສົ່ງເສີມການຮ່ວມມື ອາຊຽນ-ການາດາ ການສຸມໃສ່ການເຈລະຈາຮ່າງສັນຍາການຄ້າເສລີອາຊຽນ-ການາດາ (ACAFTA), ການຊ່ວຍເຫລືອເພື່ອການພັດທະນາ ແລະ ດ້ານວິຊາການຂອງການາດາໃຫ້ແກ່ອາຊຽນ ລວມທັງ ສປປ ລາວ, ການກະກຽມຂອງ ສປປ ລາວ ໃນການເປັນເຈົ້າພາບກອງປະຊຸມທົບທວນຄັ້ງທີ 3 ສົນທິສັນຍາລະເບີດລູກຫວ່ານ ໃນທ້າຍປີ 2026, ການຊ່ວຍເຫລືອຂອງການນາດາ ໃນຂະບວນການກະກຽມໃຫ້ແກ່ກອງປະຊຸມກັ່ງກ່າວ ກໍຄືໃນວຽກງານເກັບກູ້ລະເບີດບໍ່ທັນແຕກ (UXO) ຢູ່ ສປປ ລາວ. ໃນໂອກາດໄປເຄື່ອນໄຫວຢູ່ການາດາ, ທ່ານເອກອັກຄະລັດຖະທູດລາວຄົນໃໝ່ຍັງໄດ້ພົບປະຢື້ຢາມຖາມຂ່າວກັັບພີ່ນ້ອງຄົນເຊື້ອຊາດລາວ ທີ່ດຳລົງຊີວິດຢູ່ການາດາ ໂດຍສະເພາະຢູ່ເມືອງຄິດຈະເນີ ( Kitchener ) ແລະ ເມືອງໃກ້ຄຽງໃນແຂວງອອນຕາລິໂອ ( Ontario) ອີກດ້ວຍ. ການພົບປະກັບພີ່ນ້ອງເຊື້ອຊາດລາວໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ, ຄວາມພູມໃຈໃນຕົ້ນກຳເນີດເປັນລາວ ແລະ ມໍລະດົກວັດທະນາທຳອັນອຸດົມຮັ່ງມີຂອງຄົນລາວ.
Click here for the English version
On 22 January 2026, at Rideau Hall in Ottawa, H.E Mr. Phoukhong Sisoulath, Ambassador-designate of the Lao PDR, presented the Letters of Credence from His Excellency Mr. Thongloun Sisoulith, President of the Lao People’s Democratic Republic, to Her Excellency Mary Simon, Governor General and Commander-in-Chief of Canada, accrediting him as the new Ambassador Extraordinary and Plenipotentiary of the Lao People’s Democratic Republic to Canada, with the chancery in Washington, D.C.
On this occasion, the New Lao Ambassador conveyed the warm greetings and best wishes of His Excellency Mr. Thongloun Sisoulith, President of the Lao PDR, to Her Excellency the Governor General and, through her, to the Government and people of Canada.
Her Excellency Governor General of Canada expressed her appreciation to the President of the Lao PDR and extended her congratulations to the newly appointed Lao Ambassador on the assumption of his duties in Canada. She also highly valued the friendly relations and cooperation between Canada and Laos, as well as the mutual support between the two countries in multilateral forums over the years.
The Lao Ambassador expressed his sincere appreciation to Her Excellency the Governor General and to the Canadian authorities for the warm welcome extended to him, and reaffirmed his strong commitment to fulfilling his duties to further promote and strengthen the friendly relations and cooperation between the Lao PDR and Canada. The Ambassador also reassured that the Lao PDR, in the capacity of ASEAN–Canada Country Coordinator, would continue to play an active role in strengthening the ASEAN–Canada Strategic Partnership, particularly in advancing the negotiations on the ASEAN–Canada Free Trade Agreement (ACAFTA), aiming at its conclusion as envisioned by both sides.
On this occasion, on 23 January 2026, H.E Mr. Phoukhong Sisoulath, Ambassador Extraordinary and Plenipotentiary of the Lao People’s Democratic Republic to Canada held bilateral meetings with relevant Canadian authorities of Global Affairs Canada, namely Mr. Alan Bowman, Director General for the Southeast Asia and Oceania Bureau; Ms. Mary-Catherine Speirs, Director General for the Trade Negotiations Bureau; Ms. Judith Gelbman, Director of the Multilateral and Regional Programming Division; and Mr. Timothy Edwards, Director of the Weapons Threat Reduction Programs Division. During the meetings, the Lao and Canadian sides had constructive exchange of views and perspectives aimed at further strengthening and expanding Lao–Canada bilateral relations and cooperation in various fields, including political consultation, trade, investment, tourism, people-to-people diplomacy, scholarships, as well as the promotion of teaching and use of the French language in the Lao PDR. Both sides also exchanged views on enhancing ASEAN–Canada cooperation, with a particular focus on the ongoing negotiations of an ASEAN–Canada Free Trade Agreement (ACAFTA); Canada’s development assistance and technical aid to ASEAN, benefiting the Lao PDR as an ASEAN member state; the Lao PDR’s preparations to host the Third Review Conference of the Convention on Cluster Munitions in late 2026. Discussions also covered Canada’s support for the preparations for the Review Conference, as well as its continued assistance in unexploded ordnance (UXO) clearance efforts in the Lao PDR. During this official trip to Canada, the new Ambassador of Laos to Canada also took the opportunity to visit and meet with members of the Lao diaspora in Kitchener city, Ontario province. The meeting went in the spirit of friendship, the pride of Lao roots, as well as the rich Lao culture heritage.
ທ່ານ ພູໂຂງ ສີສຸລາດ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສະຫະລັດ ອາເມລິກາ ແລະ ການາດາ ເຂົ້າຍື່ນສານຕາຕັ້ງຕໍ່ພະນະທ່ານ ໂດນັນ ທຣຳ, ປະທານາທິບໍດີ ແຫ່ງ ສະຫະລັດ ອາເມລິກາ.
ໃນຕອນເຊົ້າຂອງວັນທີ 05 ກັນຍາ 2025 ທີ່ ທຳນຽບຂາວ, ທ່ານ ພູໂຂງ ສີສຸລາດ ໄດ້ເຂົ້າຍື່ນສານຕາຕັ້ງຕໍ່ພະນະທ່ານ ໂດນັນ ທຣຳ, ປະທານາທິບໍດີ ແຫ່ງ ສະຫະລັດ ອາເມລິກາ ເພື່ອດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສະຫະລັດ ອາເມລິກາ ຄົນໃໝ່, ເຊິ່ງມີສຳນັກງານການທູດຕັ້ງຢູ່ນະຄອນຫຼວງວໍຊິງຕັນ, ດີຊີ (Washington, D.C.).
ໃນໂອກາດດັ່ງກ່າວ, ທ່ານທູດ ພູໂຂງ ສີສຸລາດ ໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ ແລະ ຄໍາອວຍພອນອັນປະເສີດຈາກ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ເຖິງພະນະທ່ານປະທານາທິບໍດີ ໂດນັນ ທຣຳ ກໍ່ຄື ລັດຖະບານ ແລະ ປະຊາຊົນອາເມລິກາ. ພ້ອມກັນນັ້ນ, ທ່ານທູດ ພູໂຂງ ສີສຸລາດ ຍັງໄດ້ແຈ້ງສະພາບການພັດທະນາເສດຖະກິດ-ສັງຄົມຂອງ ສປປ ລາວ ພ້ອມທັງໄດ້ສະແດງຄວາມຂອບໃຈອັນຈິງໃຈຕໍ່ການຮ່ວມມື ແລະ ການຊ່ວຍເຫຼືອຂອງລັດຖະບານສະຫະລັດ ອາເມລິກາ ພາຍໃຕ້ຂອບການຮ່ວມມືແບບກວມລວມ ຊຶ່ງຜູ້ນຳຂອງສອງປະເທດໄດ້ລົງນາມຮ່ວມກັນໃນປີ 2016 ເປັນຕົ້ນມາ ກວມເອົາບັນດາຂົງເຂດເປັນຕົ້ນແມ່ນການເກັບກູ້ລະເບີດທີ່ບໍ່ທັນແຕກ, ການສຶກສາ ແລະ ການຝຶກອົບຮົມ, ສາທາລະນະສຸກ, ການບັງຄັບໃຊ້ກົດໝາຍ ແລະ ຂົງເຂດອື່ນໆອີກ ເຊິ່ງໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ໃນຊຸມປີຜ່ານມາ, ພ້ອມທັງເປັນການຊຸກຍູ້ສົ່ງເສີມການພົວພັນຮ່ວມມືລາວ-ອາເມລິກາ. ໂດຍເນັ້ນໜັກເຖິງຄວາມສຳຄັນຂອງການພົວພັນລະຫວ່າງສອງປະເທດ ລາວ-ອາເມລິກາ ທີ່ມີສາຍພົວພັນທາງການທູດອັນຍາວນານນຳກັນເປັນເວລາ 70 ປີມາຮອດປັດຈຸບັນ, ທ່ານທູດ ພູໂຂງ ສີສຸລາດ ຍັງໄດ້ຢືນຢັນຄໍາໝາຍໝັ້ນໃນການປະຕິບັດໜ້າທີ່ການທູດຂອງຕົນໃຫ້ດີທີ່ສຸດ ເພື່ອສືບຕໍ່ຮັກສາ, ເສີມຂະຫຍາຍ ແລະ ຮັດແໜ້ນການພົວພັນຮ່ວມມືໃນດ້ານຕ່າງໆ ລະຫວ່າງ ສປປ ລາວ ແລະ ສະຫະລັດ ອາເມລິກາ ໃຫ້ເກີດດອກອອກຜົນ ບົນພື້ນຖານການເຄົາລົບນັບຖືເຊິ່ງກັນ ແລະ ກັນ ແລະ ເພື່ອຜົນປະໂຫຍດຮ່ວມຂອງປະຊາຊົນສອງປະເທດ.
ໃນຂະນະດຽວກັນ, ປະທານາທິບໍດີ ໂດນັນ ທຣຳ ໄດ້ຕີລາຄາສູງຕໍ່ສາຍພົວພັນການທູດ ລາວ-ອາເມລິກາ ຄົບຮອບ 70 ປີ ທີ່ເປັນຂີດຫມາຍສໍາຄັນຂອງການພົວພັນ ແລະ ຮ່ວມມືລະຫວ່າງສອງປະເທດ ພ້ອມທັງສະແດງຄວາມຂອບໃຈຕໍ່ລັດຖະບານລາວ ທີ່ໄດ້ໃຫ້ການຮ່ວມມືໃນຂົງເຂດຕ່າງໆ ເປັນຕົ້ນແມ່ນການຄົ້ນຫາທະຫານອາເມລິກາ ທີ່ຫາຍສາບສູນຢູ່ລາວ ໃນປາງສົງຄາມ, ການແກ້ໄຂບັນຫາຄົນເຂົ້າເມືອງຜິດກົດໝາຍໃນອາເມລິກາ ແລະ ອື່ນໆ. ນອກຈາກນັ້ນ, ປະທານາທິບໍດີ ທຣຳ ຍັງໄດ້ສະແດງຄວາມຊົມເຊີຍຕໍ່ບົດບາດຂອງ ສປປ ລາວ ໃນການເປັນປະທານອາຊຽນໃນປີ 2024 ແລະ ຢືນຢັນຄວາມໝາຍໝັ້ນໃນການເຮັດວຽກຢ່າງໃກ້ຊິດກັບລັດຖະບານລາວ ເພື່ອສືບຕໍ່ສົ່ງເສີມສັນຕິພາບ ແລະ ຄວາມສົມບູນພູນສຸກຂອງສອງປະເທດ ລາວ-ອາເມລິກາ ກໍ່ຄືໃນທົ່ວອາຊີຕາເວັນອອກສ່ຽງໃຕ້.
ທ່ານ ພູໂຂງ ສີສຸລາດ ດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳສະຫະລັດ ອາເມລິກາ ເປັນຄົນທີ 9 ນັບຕັ້ງແຕ່ປີ 1975 ເປັນຕົ້ນມາ.
ນອກຈາກນີ້, ທ່ານ ພູໂຂງ ສີສຸລາດ ໃນຖານະເປັນເອກອັກຄະລັດຖະທູດແຕ່ງຕັ້ງປະຈຳການາດາ ກໍມີແຜນເດີນທາງໄປການາດາ ໃນອະນາຄົດອັນໃກ້ນີ້ ເພື່ອຍື່ນສານຕາຕັ້ງຕໍ່ຜູ້ສໍາເລັດຣາຊະການ ແຫ່ງ ການາດາ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ການາດາ ໂດຍມີສຳນັກງານການທູດຕັ້ງຢູ່ນະຄອນຫຼວງວໍຊິງຕັນ, ດີຊີ, ສະຫະລັດ ອາເມລິກາ.
ທ່ານທູດ ສີສະຫວາດ ອິນພະຈັນ ເຂົ້າຮ່ວມພິທີເປີດຫ້ອງການກົງສຸນກິດຕິມະສັກ ແຫ່ງ ສປປ ລາວ ປະຈຳ ປະເທດການາດາ
ໃນວັນທີ 31 ມີນາ 2023, ທ່ານ ສີສະຫວາດ ອິນພະຈັນ, ເອກອັກຄະລັດຖະທູດແຫ່ງ ສປປ ລາວ ປະຈຳ ສ. ອາເມລິກາ ແລະ ການາດາ ໄດ້ເຂົ້າຮ່ວມພິທີເປີດຫ້ອງການກົງສຸນກິດຕິມະສັກແຫ່ງ ສປປ ລາວ ປະຈຳ ປະເທດການາດາ ທີ່ມີຫ້ອງການຕັ້ງຢູ່ ເຂດເມືອງ Richmond, ແວນຄູເວີ, ລັດບຼິທິສ໌ ໂກລຳເບຍ. ເຂົ້າຮ່ວມໃນພິທີດັ່ງກ່າວຈາກຝ່າຍການາດາມີ ທ່ານ Wilson Miao, ສະມາຊິກສະພາສູນກາງຈາກເຂດເລືອກຕັ້ງ Richmond, ທ່ານ ນາງ Alexa Loo, ວ່າການເຈົ້າເມືອງ Richmond, ແລະ ຈາກຝ່າຍລາວມີ ທ່ານ ພູເງິນ ສີອາໂນໄທ, ຄະນະກຳມະການສູນກາງແນວລາວສ້າງຊາດ ປະຈຳການາດາ, ທີມງານລາວທີວີການາດາ ແລະ ຄົນເຊື້ອຊາດລາວຢູ່ປະເທດການາດາຈຳນວນຫນຶ່ງ ທີ່ມາຈາກລັດອົງຕາຣິໂອ, ເກເບັກ ແລະ ເມືອງແວນຄູເວີ ລວມທັງໝົດ 20 ກວ່າ ຄົນ. ນອກນັ້ນ, ໃນງານລ້ຽງຮັບຮອງຈັດໂດຍທ່ານກົງສຸນກິດຕິມະສັກ ກໍ່ມີແຂກການາດາທີ່ສຳຄັນຈຳນວນໜຶ່ງເຂົ້າຮ່ວມເຊັ່ນ: ທ່ານ Bruce Ralston, ສະມາຊິກສະພານິຕິບັນຍັດ ທັງເປັນຜູ້ຕາງໜ້າເຈົ້າຄອງລັດບຼິດທິສ໌ ໂກລຳເບຍ ແລະ ທ່ານ Phil Calvert, ອະດີດທູດການາດາ ປະຈຳລາວ.
ໃນພິທີດັ່ງກ່າວ, ທ່ານທູດ ສີສະຫວາດ ອິນພະຈັນ ໄດ້ມີຄຳເຫັນສະແດງຄວາມຊົມເຊີຍຕໍ່ທ່ານກົງສຸນກິດຕິມະສັກທີ່ໄດ້ປະກອບ ສ່ວນເຄື່ອນໄຫວວຽກງານໃນຖານະກົງສຸນກິດຕິມະສັກ ແຫ່ງ ສປປ ລາວ ໃນໄລຍະຜ່ານມາ. ພ້ອມນີ້, ທ່ານທູດ ຍັງໄດ້ຍົກໃຫ້ເຫັນການຮ່ວມມືສອງຝ່າຍລາວ-ການາດາ ແລະ ໄດ້ສະເຫນີໃຫ້ທ່ານກົງສຸນກິດຕິມະສັກສືບຕໍ່ປະຕິບັດຫນ້າທີ່ວຽກງານຕາມພາລະບົດບາດຂອງຕົນ ຢ່າງມີປະສິດທິພາບໃນການສົ່ງເສີມຄວາມຮັບຮູ້ ແລະ ເຂົ້າໃຈກ່ຽວກັບ ສປປ ລາວ ຢູ່ ການາດາ ໃຫ້ຫຼາຍຂຶ້ນ ເພື່ອປະກອບສ່ວນເຂົ້າໃນການສົ່ງເສີມການຄ້າ, ການລົງທຶນ, ການທ່ອງທ່ຽວ ແລະ ການໄປມາຫາສູ່ ລະຫວ່າງປະຊາຊົນລາວ ແລະ ການາດາ ໃຫ້ນັບມື້ນັບຫຼາຍຂຶ້ນຕາມທ່າແຮງຂອງສອງປະເທດ. ປັດຈຸບັນ, ການຄ້າ ແລະ ການລົງທຶນ ລະຫວ່າງລາວ ແລະ ການາດາ ໄດ້ມີບາດກ້າວຂະຫຍາຍຕົວໄປໃນທາງບວກ ແລະ ນັກລົງທຶນການາດາ ໄດ້ເລີ່ມມີການລົງທຶນຢູ່ລາວໃນ ບາງຂົງເຂດເປັນຕົ້ນແມ່ນດ້ານເອເລັກໂຕຼນິກ, ເຕັກໂນໂລຊີ, ການຢາ ແລະ ການປຸງແຕ່ງອາຫານ. ນອກຈາກນັ້ນ, ທ່ານທູດ ສີສະຫວາດ ອິນພະຈັນ ຍັງໄດ້ຖືໂອກາດນີ້ຢ້ຽມຢາມຖາມຂ່າວພີ່ນ້ອງຄົນເຊື້ອຊາດລາວທີ່ດຳລົງຊີວິດຢູ່ແວນຄູເວີ ເພື່ອສ້າງຄວາມລຶ້ງເຄີຍ ແລະ ຮັດແໜ້ນຄວາມສາມັກຄີ-ຮັກແພງ ລະຫວ່າງສະຖານທູດກັບພີ່ນ້ອງຄົນເຊື້ອຊາດລາວທີ່ລັດດັ່ງກ່າວໃຫ້ກວ້າງຂວ້າງ ແລະ ແໜ້ນແຟ້ນຍິ່ງຂຶ້ນ.
ທ່ານ ຈອນ ພັນທຸແພງ ເປັນກົງສຸນກິດຕິມະສັກຜູ້ທີ 2 ຂອງ ສປປ ລາວ ຖັດຈາກທ່ານ Michele Sorrenti ທີ່ໝົດວາລະໃນປີ 2020. ທ່ານ ຈອນ ພັນທຸແພງ ໄດ້ຮັບການແຕ່ງຕັ້ງເປັນກົງສຸນກິດຕິມະສັກແຫ່ງ ສປປ ລາວ ປະຈຳ ການາດາ ໃນວັນທີ 19 ມັງກອນ 2021, ແຕ່ເນື່ອງຈາກສະພາບການແຜ່ລະບາດຂອງພະຍາດໂຄວິດ-19 ຈຶ່ງໄດ້ເລື່ອນການເປີດຫ້ອງການມາຈົນເຖິງປັດຈຸບັນ.