ການແພ່ລະບາດຂອງເຊື້ອພະຍາດ Covid-19 ໄດ້ນໍາມາຊຶ່ງຜົນກະທົບຕໍ່ການດໍາລົງຊີວິດປົກກະຕິຂອງປະຊາຊົນຫຼາຍປະເທດໃນທົ່ວ ໂລກ ແລະ ລວມທັງ ສປປ ລາວ. ຫຼາຍປະເທດ ໄດ້ນໍາໃຊ້ມາດຕະການຕ່າງໆ ຢ່າງເຂັ້ມງວດ ເພື່ອຮັບມືກັບສະພາບການແພ່ລະບາດຂອງພະຍາດດັ່ງ ກ່າວໂດຍສະເພາະ ການປິດການເຂົ້າ-ອອກປະເທດ, ການຢູ່ຫ່າງກັນໃນສັງຄົມ ແລະ ອື່ນໆ, ດັ່ງນັ້ນ,  ຈຶ່ງ ສົ່ງຜົນກະທົບໃຫ້ພົນລະເມືອງລາວຈໍານວນບໍ່ໜ້ອຍ ລວມທັງນັກທຸລະກິດ ແລະ ນັກສຶກສາລາວ ທີ່ມາຢ້ຽມຢາມ ແລະ ສຶກສາຮໍ່າຮຽນຢູ່ ອາເມລິກາ ແລະ ການາດາ ຕົກຄ້າງບໍ່ສາມາດກັບຄືນປະເທດໃນສະພາບດັ່ງກ່າວ.

          ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສ.ອາເມລິກາ ແລະ ການາດາ ທີ່ນະຄອນຫຼວງວໍຊິງຕັນ ດີຊີ ໂດຍໄດ້ຮັບການຊີ້ນຳຈາກກະຊວງການຕ່າງປະເທດ ສປປ ລາວ, ໄດ້ເອົາໃຈໃສ່ຊ່ວຍເຫຼືອ ແລະ ແກ້ໄຂບັນຫາພົນລະເມືອງລາວ ຕົກຄ້າງ ໂດຍການປະສານກັບພາກສ່ວນກ່ຽວຂ້ອງຕ່າງໆ ຂອງປະເທດເຈົ້າພາບ, ສະໜອງຂໍ້ມູນທີ່ຈໍາເປັນ ແລະ ໃຫ້ຄຳແນະນຳການເດີນທາງໄປມາ ເພື່ອຫຼີກລ້ຽງການຕິດເຊື້ອພະຍາດ Covid-19. ພ້ອມດຽວກັນ, ສະຖານເອກອັກຄະລັດຖະທູດໄດ້ລາຍງານ ແລະ ປະສານພາກສ່ວນກ່ຽວ ຂ້ອງຂອງລາວ ເພື່ອອໍານວຍຄວາມສະດວກໃຫ້ພົນລະເມືອງລາວຕົກຄ້າງເດີນທາງກັບຄືນປະເທດ. ມາຮອດວັນທີ 30 ພຶດສະພາ 2020, ສະຖານເອກອັກຄະລັດຖະທູດ ໄດ້ຊ່ວຍເຫຼືອພົນລະເມືອງລາວຈຳນວນ 26 ຄົນ ໃຫ້ເດີນທາງກັບຮອດລາວຢ່າງປອດໄພໂດຍ ສາຍການບິນລາວ ຈາກສ.ເກົາຫຼີ ເຖິງນະຄອນຫຼວງວຽງຈັນ, ເຊິ່ງພາຍຫຼັງເດີນທາງເຖິງລາວແລ້ວ, ພວກກ່ຽວໄດ້ປະຕິບັດ ຕາມມາດຕະການປ້ອງກັນພະຍາດ Covid-19 ຂອງຄະນະສະເພາະກິດຂອງລາວ ທີ່ໄດ້ກໍານົດໄວ້ຢ່າງເຂັ້ມງວດເປັນຕົ້ນແມ່ນກວດກາອຸນ ນະພູມທີ່ສະໜາມບິນ, ກັກຕົວ 14 ວັນ ເພື່ອເຝົ້າລະວັງ ແລະ ອື່ນໆ.  ນັບວ່າເປັນຂ່າວດີ ທີ່ມີລາຍງານວ່າ ພົນລະເມືອງລາວທີ່ເດີນທາງ ມາຈາກອາເມລິກາທັງໝົດ 26 ຄົນບໍ່ມີອາການຕິດເຊື້ອພະຍາດ Covid-19 ແຕ່ຢ່າງໃດ. ປະຈຸບັນ, ສະຖານທູດຍັງສືບຕໍ່ຊ່ວຍເຫຼືອພົນລະເມືອງລາວ ສິບກວ່າຄົນທີ່ຕົກຄ້າງ ຢູ່ ສ.ອາເມລິກາ ທີ່ສະເໜີຂໍການຊ່ວຍເຫຼືອຂອງສະຖານທູດ ເພືື່ອກັບຄືນປະເທດ.

ສຳລັບຜູ້ຕິດເຊື້ອພະຍາດCovid-19 ຢູ່ ສປປ ລາວ ມີທັງໝົດຈໍານວນ 19 ຄົນ, ບໍ່ມີກໍລະນີເສຍຊີວິດ, ຜູ້ຕິດເຊື້ອທັງໝົດໄດ້ຮັບການ ເອົາໃຈໃສ່ໃນການປິ່ນປົວໃຫ້ຫາຍດີ ແລະ ຄ່ອຍໆອອກຈາກສະຖານທີ່ປິ່ນປົວ, ແລະ ມາຮອດວັນທີ 9 ມິຖຸນາ 2020 ຜູ້ຕິດເຊື້ອພະ ຍາດ Covid-19 ຄົນສຸດທ້າຍຂອງ ສປປ ລາວ ໄດ້ຮັບການປິ່ນປົວໃຫ້ຫາຍດີ ແລະ ອອກໂຮງໝໍແລ້ວ. ພ້ອມນີ້, ຖືວ່າ ເປັນເວລາເກືອບ ສອງເດືອນ ທີ່ບໍ່ມີລາຍງານການພົບຜູ້ຕິດເຊື້ອພະຍາດ Covid-19 ກໍລະນີໃໝ່ຢູ່ລາວ. ຍ້ອນແນວນັ້ນລັດຖະ ບານລາວໄດ້ຜ່ອນຜັນການປະຕິບັດມາດຕະການປ້ອງກັນຢູ່ພາຍໃນປະເທດ. ການແກ້ໄຂບັນຫາການແພ່ລະບາດເຊື້ອພະຍາດCovid-19 ຂອງລັດຖະບານລາວ ໄດ້ຮັບຜົນສໍາເລັດດີຍ້ອນມີການຊີ້ນໍາ ແລະ ການຈັດຕັ້ງພາຍໃນທີ່ເຂັ້ມແຂງ, ປະຊາຊົນໃຫ້ການຮ່ວມມື ແລະ ມີ ການຊ່ວຍເຫຼືອຈາກເພື່ອນມິດດ້ານ ເຕັກນິກປ້ອງກັນ, ຊ່ຽວຊານ ແລະອຸປະກອນການແພດ ແລະ ອື່ນໆ.