Home Blog Page 2

ໃນວັນທີ 20 ສິງຫາ 2022, ສະຖານເອກອັກຄະລັດຖະທູດ ແຫ່ງ ສປປ ລາວ ທີ່ ນະຄອນຫຼວງ ວໍຊິງຕັນ ດີ.ຊີ ໄດ້ເຂົ້າຮ່ວມຈັດກິດຈະກຳສະເຫຼີມສະຫຼອງວັນຄອບຄົວອາຊຽນ ກັບບັນດາສະຖານທູດປະເທດສະມາຊິກອາຊຽນ ທີ່ ສະຖານທູດ ກຳປູເຈຍ

ເພື່ອເປັນການສ້າງຂະບວນການສະເຫຼີມສະຫຼອງວັນຄອບຄົວອາຊຽນ ແລະ ສົ່ງເສີມສາຍພົວພັນອັນດີລະຫວ່າງບັນດາສະຖານທູດປະເທດສະມາຊິກອາຊຽນປະຈຳສ.ອາເມລິກາ, ຄະນະກຳມະການອາຊຽນທີ່ນະຄອນຫຼວງວໍໍຊິງຕັນ, ດີຊີ ຫຼື ASEAN Committee in Washington DC (ACW), ພາຍໃຕ້ການເປັນປະທານໝູນວຽນຂອງໄທ, ໄດ້ມີການປຶກສາຫາລື ແລະ ເຫັນດີໃນການຈັດກິດຈະກຳຮ່ວມກັນ ເພື່ອສະເຫຼີມສະຫຼອງວັນສຳຄັນຂອງອາຊຽນ ແລະ ເພື່ອສ້າງໂອກາດໃນການພົບປະ, ປຶກສາຫາລື ແລະ ແລກປ່ຽນກ່ຽວກັບບັນຫາຕ່າງໆ ລະຫວ່າງບັນດາເອກອັກຄະລັດຖະທູດ ພ້ອມດ້ວຍພະນັກງານ ແລະ ສະມາຊິກຄອບຄົວສະຖານທູດອາຊຽນທີ່ປະຈຳການຢູ່ສ.ອາເມລິກາ. ການກິດຈະກຳສະເຫຼີມສະຫຼອງດັ່ງກ່າວໄດ້ຈັດຂຶ້ນໃນວັນທີ 20 ສິງຫາ 2022 ທີ່ສະຖານທູດກຳປູເຈຍໃນນາມປະເທດປະທານອາຊຽນປະຈຸບັນ ນັບແຕ່ເວລາ 10:30-15:00 ໂມງ  ແລະ ມີຜູ້ເຂົ້າຮ່ວມຈາກແຕ່ລະສະຖານທູດປະເທດອາຊຽນປະມານ 20-30 ຄົນ ແລະ ແຂກຮັບເຊີນຈາກພາກສ່ວນກ່ຽວຂ້ອງຂອງປະເທດເຈົ້າພາບຈຳນວນໜຶ່ງ ລວມທັງໝົດປະມານ 300 ກວ່າຄົນ. ບັນດາກິດຈະກໍາທີ່ໄດ້ຈັດຂຶ້ນ ເພື່ອສະເຫຼີມສະຫຼອງວັນຄອບຄົວອາຊຽນຄັ້ງນີ້ປະກອບມີ: ການວ່າງສະແດງຜະລິດຕະພັນທາງດ້ານວັດທະນະທຳ, ແລະ ການຊິມອາຫານທີ່ເປັນເອກະລັກຂອງແຕ່ລະປະເທດອາຊຽນ, ການແຂ່ງຂັນກິລາມິດຕະພາບຮ່ວມກັນຄື: ກິລາໂຍນບູນ, ຊັດລູກດອກ ແລະ ດຶງເຊືອກ.

ສຳລັບສະຖານທູດລາວແມ່ນໄດ້ສົ່ງນັກກິລາເຂົ້າຮ່ວມແຂງຂັນທຸກໆລາຍການ ແລະ ສາມາດຍາດໄດ້ຮັບແຊມລາງວັນທີ 1 ສຳລັບກິລາຊັດລູກດອກ ແລະ ແຂ່ງຂັນໂຍນບູນ. ພ້ອມນີ້, ກໍ່ໄດ້ນຳເອົາແຜນແພ່ ແລະ ອາຫານລາວຈຳນວນໜຶ່ງໄປວາງສະແດງ ແລະ ໃຫ້ແຂກຜູ້ເຂົ້າຮ່ວມໄດ້ຮັບປະທານ, ​ເຊິ່ງເຫັນວ່າ ໄດ້ຮັບຄວາມສົນໃຈຫຼາຍຈາກແຂກຜູ້ເຂົ້າຮ່ວມ.

ການຈັດກິດຈະກຳຮ່ວມກັນຂອງບັນດາສະຖານທູດປະເທດອາຊຽນ ເພື່ອສະເຫຼີມສະຫຼອງວັນຄອບຄົວອາຊຽນຄັ້ງນີ້ ຖືເປັນຄັ້ງທຳອິດ ພາຍຫຼັງສະພາບການແພ່ລະບາດຂອງພະຍາດໂຄວິດ-19 ໃນສ.ອາເມລິກາ ໄດ້ຫຼຸດຜ່ອນລົງ ແລະ   ໄດ້ດໍາເນີນໄປດ້ວຍບັນຍາກາດອັນຟົດຟື້ນ, ເບີກບານມ່ວນຊື່ນ ແລະ ເຕັມໄປດ້ວຍຄວາມສາມັກຄີຮັກແພງແບບຄອບຄົວອາຊຽນ ແລະ ບັນລຸໄດ້ຕາມຈຸດປະສົງລະດັບຄາດໝາຍໃນການເຄື່ອນໄຫວສົ່ງເສີມພາລະບົດບາດຂອງອາຊຽນ ແລະ ສ້າງຄວາມສາມັກຄີຮັກແພງລະຫວ່າງບັນດາສະຖານທູດປະເທດສະມາຊິກອາຊຽນໃຫ້ຂະຫຍາຍຕົວຍິ່ງໆຂຶ້ນ.

ສະຖານທູດ ແຫ່ງ ສປປ ລາວ ທີ່ ວໍຊິງຕັນ ດີຊີ ໄດ້ຈັດກິດຈະກຳຮ່ວມກັບສະຖານທູດ ສສ.ຫວຽດນາມ ເພື່ອສະເຫຼີມສະຫຼອງສອງວັນປະຫວັດສາດ ລະຫວ່າງ ສປປລາວ ແລະ ສສ.ຫວຽດນາມ

 

ເພື່ອເປັນການສ້າງຂະບວນການຂໍ່ານັບຮັບຕ້ອນ ແລະ ສະເຫຼີມສະຫຼອງສອງວັນປະຫວັດສາດ (ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນສ້າງຕັ້ງສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ) ແລະ ທັງເປັນການຮັດແໜ້ນຄວາມສາມັກຄີລະຫວ່າງສອງສະຖານທູດລາວ-ຫວຽດນາມ, ໃນຕອນເຊົ້າຂອງວັນເສົາທີ 6 ສິງຫາ 2022, ເອກອັກຄະລັດຖະທູດແຫ່ງ ສປປລາວ ປະຈຳສະຫະລັດອາເມລິກາ ແລະ ການາດາ ແລະ ທ່ານ Nguyen Quoc Dzung, ເອກອັກຄະລັດຖະທູດແຫ່ງ ສສ.ຫວຽດນາມປະຈໍາສ.ອາເມລິກາ ໄດ້ນຳພາພະນັກງານຂອງຕົນຮ່ວມກັນຈັດກິດຈະກຳພົບປະ, ແຂ່ງຂັນກິລາ ແລະ ຈັດພາເຂົ້າສາມັກຄີທີ່ສ່ວນສາທາລະນະ ໂດຍມີຜູ້ເຂົ້າຮ່ວມທັງໝົດປະມານ 60 ຄົນ. ໃນໂອກາດນີ້, ທັງສອງຝ່າຍ ໄດ້ຜັດປ່ຽນກັນມີຄຳເຫັນໂດຍໄດ້ຫວນຄືນເຖິງຄວາມໝາຍຄວາມສຳຄັນຂອງສອງວັນປະຫວັດສາດລະຫວ່າງ ລາວ-ຫວຽດນາມ ໂດຍສະເພາະແມ່ນ ການປະກອບສ່ວນຂອງຜູ້ນຳທີ່ຍິ່ງໃຫຍ່ ແລະ ແສນເຄົາລົບຮັກ ແລະ ບັນດາວິລະຊົນທີ່ກ້າຫານຂອງສອງປະເທດ ທີ່ໄດ້ຮ່ວມສຳພັນສູ້ຮົບ ແລະ ເສຍສະຫຼະຊີວິດ ເພື່ອນຳເອົາອິດສະຫຼະພາບ, ເອກະລາດ ແລະ ຄວາມວັດທະນາຖາວອນມາສູ່ປະເທດລາວ ແລະ ຫວຽດນາມ. ພ້ອມທັງ ໄດ້ເໜັ້ນໜັກໃຫ້ບັນດາຄົນຮຸ່ນໜຸ່ມສືບຕໍ່ມູນເຊື້ອດັ່ງກ່າວ ແລະ ຮ່ວມກັນຮັດແໜ້ນ ແລະ ເສີມຂະຫຍາຍມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ແລະ ການຮ່ວມມືຮອບດ້ານລະຫວ່າງ ສອງຊາດລາວ-ຫວຽດນາມ ໃນປະຈຸບັນ ໃຫ້ໝັ້ນຄົງທະນົງແກ່ນ ແລະ ເຂັ້ມແຂງຕະຫຼອດກາລະນານ.  

ການຈັດກິດຈະກຳຮ່ວມກັນຂອງສອງສະຖານທູດລາວ-ຫວຽດນາມ ຄັ້ງນີ້ ຖືເປັນຄັ້ງທຳອິດ ພາຍຫຼັງສະພາບການແພ່ລະບາດຂອງພະຍາດໂຄວິດ-19 ໄດ້ຫຼຸດຜ່ອນລົງ ແລະ ໄດ້ດໍາເນີນໄປດ້ວຍບັນຍາກາດອັນຟົດຟື້ນ, ເບີກບານມ່ວນຊື່ນ ແລະ ເຕັມໄປດ້ວຍຄວາມສາມັກຄີຮັກແພງແບບພິເສດຖານສະຫາຍອ້າຍນ້ອງ ແລະ ບັນລຸໄດ້ຕາມຈຸດປະສົງລະດັບຄາດໝາຍ ຂອງສອງຝ່າຍ ໃນການເສີມຂະຫຍາຍຄວາມສາມັກຄີ ພິເສດລະຫວ່າງ ສອງຊາດກໍຄືສອງສະຖານທູດໃຫ້ຂະຫຍາຍຕົວ ແລະ ແຕກດອກອອກຜົນຍິ່ງໆຂຶ້ນ

 

ທ່ານ ເອກອັກຄະລັດຖະທູດ ແຫ່ງ ສປປ ລາວ ປະຈຳ ສ.ອາເມລິກາ ແລະ ການາດາ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ປະທານສະຖາບັນອາເມລິກາ-ອາຊີ ໃນວັນທີ 4 ສິງຫາ 2022 ທີ່ ສະຖານທູດ

 

ໃນຕອນເຊົ້າຂອງວັນຈັນທີ 4 ສິງຫາ 2022, ພະນະທ່ານ ສີສະຫວາດ ອິນພະຈັນ, ເອກອັກຄະລັດຖະທູດຜູ້ມີອຳນາດເຕັມແຫ່ງ ສປປລາວ ປະຈຳສະຫະລັດອາເມລິກາ ແລະ ການາດາ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ Glenn Lau-Kee, ປະທານສະຖາບັນອາເມລິກາ-ອາຊີ (US-Asia Institution) ແລະ ຄະນະ ທີ່ປະຈໍາຢູ່ຫ້ອງການຂອງສະຖາບັນສາຂາທີ່ນິວຢອກ, ເພື່ອພົບປະທໍາຄວາມຮູ້ຈັກໃນໂອກາດທີ່ທ່ານເອກອັກຄະລັດຖະທູດໄດ້ຖືກແຕ່ງຕັ້ງມາຮັບໜ້າທີ່ໃໝ່ ແລະ ໃນໂອກາດທີ່ທ່ານ Glenn ໄດ້ເດີນທາງເຄື່ອນໄຫວຢູ່ນະຄອນຫຼວງວໍຊິງຕັນ,​ ດີຊີ. ໃນໂອກາດດັ່ງກ່າວ ທ່ານ Glenn,​ ໄດ້ລາຍງານໂດຍຫຍໍ້ກ່ຽວກັບພາລະບົດບາດ ແລະ ການເຄື່ອນໄຫວຂອງສະຖາບັນອາເມລິກາ-ອາຊີ ຫຼື USAI, ເຊິ່ງເປັນອົງການບໍ່ຂຶ້ນກັບລັດຖະບານ ທີ່ໄດ້ຖືກສ້າງຕັ້ງຂຶ້ນໃນປີ 1979 ໂດຍທ່ານ Joji Konoshima ແລະ ທ່ານ Esther G.Kee ພາຍຫຼັງກອງປະຊຸມຜູ້ແທນຈາກສະມາຄົມອາເມລິກາ-ອາຊຽນ ທີ່ ທໍານຽບຂາວໃນປີ 1978 ໂດຍໄດ້ຮັບການສະໜັບສະໜູນຈາກທ່ານ Jimmy Carter, ອະດີດປະທານາທິບໍດີອາເມລິກາ ແລະ ທ່ານ Rchard C. Holbrooke, ຜູ້ຊ່ວຍລັດຖະມົນຕີ, ຫົວໜ້າຫ້ອງການອາຊີ-ປາຊີຟິກ ກະຊວງການຕ່າງສປະເທດ ສ.ອາເມລິກາ. ສະຖາບັນ USIA ໄດ້ເຮັດວຽກໃນການສົ່ງເສີມຄວາມເຂົ້າໃຈອັນດີລະຫວ່າງສ.ອາເມລິກາ ແລະ ບັນດາປະເທດອາຊີຕາເວັນອອກສ່ຽງໃຕ້ ຜ່ານການຈັດຕັ້ງນຳພາຄະນະຜູ້ແທນຝ່າຍນິຕິບັນຍັດ, ທີ່ປຶກສາສະມາຊິກສະພາ ແລະ ເຈົ້າໜ້າທີ່ກ່ຽວຂ້ອງອື່ນໆ ໃນການຢ້ຽມຢາມ ແລະ ພົບປະຄູ່ຮ່ວມຕໍາແໜ່ງຢູ່ບັນດາປະເທດອາຊຽນ,  ເຊິ່ງນັບແຕ່ໄດ້ຮັບການສ້າງຕັ້ງຂຶ້ນ ສະຖາບັນດັ່ງກ່າວໄດ້ນຳພາຄະນະຜູ້ແທນເດີນທາງຢ້ຽມຢາມປະເທດໃນເຂດອາຊີໃຕ້ ແລະ ອາຊີຕາເວັນອອກສຽງໃຕ້ ຫຼາຍກວ່າ 200 ຄະນະ ເຊັ່ນ: ສປ.ຈີນ, ສ.ເກົາຫຼີ, ຍີ່ປຸ່ນ,​ ສິງກະໂປ, ໄທ,​ ມາເລເຊຍ ແລະ ອິນໂດເນເຊຍ. ພ້ອມນີ້, ຍັງເຮັດວຽກຮ່ວມກັບສະມາຊິກລັດຖະສະພາ ແລະ ທີ່ປຶກສາ ແລະ ອົງການລັດຖະບານ ໃນການສ້າງສາຍພົວພັນທີ່ດີຮ່ວມກັບບັນດານັກການທູດຕ່າງປະເທດປະຈຳສ.ອາເມລິກາ, ພາກທຸລະກິດ ແລະ ສະຖາບັນຄົ້ນຄວ້າຕ່າງໆ ຜ່ານການຈັດກອງປະຊຸມ, ສຳມະນາ, ການລາຍງານສະພາບການຕ່າງໆ ຮ່ວມກັບພາກສ່ວນກ່ຽວຂ້ອງຂອງສ.ອາເມລິກາ ແລະ ເຈົ້າໜ້າທີ່ປະເທດອາຊຽນ, ຜູ້ນຳທາງທຸລະກິດ ແລະ ຜູ້ຊ່ຽວຊານໃນການຄົ້ນຄວ້າຕ່າງໆ​. ນອກນີ້​, ທາງສະຖາບັນຍັງສົ່ງເສີມ ແລະ ສ້າງໂອກາດໃຫ້ແກ່ນັກຮຽນ ແລະ ນັກຄົ້ນຄວ້າໄວໜຸ່ມ ໃນການສຶກສານະໂຍບາຍກ່ຽວຂ້ອງກັບສາຍພົວພັນລະຫວ່າງອາເມລິກາ-ອາຊີ ຜ່ານໂຄງການຝຶກງານ ແລະ ການພັດທະນາຄວາມເປັນມືອາຊີບ.

ພະນະທ່ານ ສີສະຫວາດ ອິນພະຈັນຕ້ອນຮັບການເຂົ້າຢ້ຽມຂໍານັບຈາກຄະນະນັກທຸລະກິດຈາກບໍລິສັດ Squire Patton Boggs ແລະ ນັກທຸລະກິດຄົນເຊື້ອຊາດລາວຈຳນວນໜຶ່ງ

ໃນຕອນບ່າຍຂອງວັນທີ 1 ກໍລະກົດ 2022, ພະນະທ່ານ ສີສະຫວາດ ອິນພະຈັນ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປລາວ ປະຈຳສະຫະລັດອາເມລິກາ ແລະ ການາດາ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຂໍ່ານັບໂດຍຄະນະນັກທຸລະກິດຄົນອາເມລິກາ ແລະ ຄົົນເຊື້ອຊາດລາວຈຳນວນໜຶ່ງ ລວມມີ ທ່ານ Rodney, ອະດີດລັດຖະມົນຕີກະຊວງຄົມມະນາຄົມອາເມລິກາ; ທ່ານ Frank Samolis, ປະທານຮ່ວມໜ່ວຍງານການຄ້າສາກົນ, ຜູ້ຊ່ຽວຊານດ້ານກົດ    ໝາຍ ແລະ ນະໂຍບາຍການຄ້າສາກົນ, ແລະ ທ່ານ Michael Curto, ຜູ້ຈັດການ ແລະ ຫຸ້ນສ່ວນຂອງບໍລິສັດ Squire Patton Boggs. ບໍລິສັດດັ່ງກ່າວເປັນບໍລິສັດທີ່ປຶກສາດ້ານກົດໝາຍທີ່ໃຫຍ່ ແລະ ມີຊື່ສຽງໃນສ.ອາເມລິກາ ທີ່ໃຫ້ບໍລິການດ້ານກົດໝາຍໃຫ້ແກ່ພາກລັດ, ຫົວໜ່ວຍທຸລະກິດ ໃນການພັດທະນາເສດຖະກິດ, ໂຄງລ່າງພື້ນຖານ ແລະ ອື່ນໆ, ມີຫ້ອງການຫຼາຍກວ່າ 40 ແຫ່ງຢູ່ໃນ 20 ປະເທດທົ່ວໂລກ ແລະ ມີພະນັກງານຫຼາຍກວ່າ 1500 ຄົນ ລວມທັງ ຜູ້ທີ່ມີຊື່ສຽງ ແລະ ມີຄວາມຊ່ຽວຊານໃນການແກ້ໄຂບັນຫາຂໍ້ຂັດແຍ່ງໃນສານສາກົນ, ເຊິ່ງໃນປີ 2022 ບໍລິສັດດັ່ງກ່າວ ໄດ້ຖືກຈັດໃນອັດດັບສຸດຍອດຂອງບັນດາບໍລິສັດກົດໝາຍ ໂດຍວາລະສານ The Legal 500 United States, ເຊິ່ງເປັນວາລະສານທີ່ມີຊື່ສຽງໃນວົງການນັກກົດໝາຍ. ສໍາລັບຄະນະນັກທຸລະກິດຄົນເຊື້ອຊາດລາວທີ່ເຂົ້າຮ່ວມຄັ້ງນີ້ມີ ທ່ານ ນາງ ສຸພາ ໄຊປຣະສິດ-ເມ, ອະດີດຜູ້ສະໝັກເລືອກຕັ້ງຜູ້ວ່າການລັດອາຄັດຊໍ, ທ່ານ ວຽງໄຊ ວິໄລກຸນ, ປະທານບໍລິສັດ ວິໄລກຸນ ຂຸດຄົ້ນບໍ່ແຮ່ ຢູ່ ສປປລາວ ພ້ອມດ້ວຍຄະນະລວມທັງໝົດ 5 ທ່ານ.

 

ຈຸດປະສົງຫຼັກຂອງການພົບປະຄັ້ງນີ້, ແມ່ນເພື່ອຮັບຟັງການສະແດງຄວາມສົນໃຈໃນການຮ່ວມມືດ້ານທຸລະກິດ ແລະ ລົງທຶນ ຢູ່ ສປປລາວ ຮ່ວມກັບບໍລິສັດທີ່ລົງທຶນຢູ່ ສປປລາວ ໂດຍບໍລິສັດ Squire Patton Boggs, ເຊິ່ງໃນໂອກາດດັ່ງກ່າວພະນະທ່ານ ສີສະຫວາດ ອິນພະຈັນ, ໄດ້ສະແດງຄວາມຕ້ອນຮັບຄະນະນັກທຸລະກິດດັ່ງກ່າວ ແລະ ໄດ້ຖືໂອກາດນີ້ ແຈ້ງທ່າ ແຮງໃນການລົງທຶນຢູ່ ສປປລາວ ໃນດ້ານຕ່າງໆ ເຊັ່ນ: ດ້ານພະລັງານສະອາດ, ດ້ານໂຄງລ່າງພື້ນຖານ, ດ້ານກະສິກຳ, ການຂຸດຄົ້ນບໍ່ແຮ່, ເທັກໂນໂລຊີ ແລະ ອື່ນໆ, ພ້ອມທັງເຊີນຊວນໃຫ້ບໍລິສັດທີ່ສົນໃຈເດີນທາງໄປຢ້ຽມຢາມລາວ ເພື່ອສຶກສາໂອກາດທີ່ເປັນໄປໄດ້ໃນການລົງທຶນ ແລະ ສະຖານທູດລາວຈະຊ່ວຍສະໜອງຂໍ້ມູນຂ່າວສານອັນຖືກຕ້ອງ ແລະ ຊ່ວຍອຳນວຍຄວາມສະດວກ ໃນການປະສານງານລະຫວ່າງພາກສ່ວນທີ່ກ່ຽວຂ້ອງຂອງສ.ອາເມລິກາ ແລະ ສປປລາວ. ໃນໂອກາດດຽວກັນ, ຄະນະນັກທຸລະກິດອາເມລິກາ ໄດ້ສະແດງຄວາມຊົມເຊີຍຕໍ່ທ່ານທູດ ສີສະຫວາດ ອິນພະຈັນ ທີ່ໄດ້ຮັບການແຕ່ງຕັ້ງໃຫ້ເປັນເອກອັກຄະລັດຖະທູດແຫ່ງ ສປປລາວ ປະຈຳສ.ອາເມລິກາ ແລະ ການາດາ, ພ້ອມທັງສະແດງຄວາມເຊື່ອໝັ້ນວ່າ ທ່ານຈະສາມາດປະຕິບັດໜ້າທີ່ອັນມີກຽດສະຫງ່າດ້ວຍຜົນສຳເລັດອັນຈົບງາມ ໃນການສົ່ງເສີມສາຍພົວພັນອັນດີລະຫວ່າງສອງປະ ເທດ ລວມທັງການຊຸກຍູ້ການຮ່ວມມືດ້ານທຸລະກິດ ເພື່ອນຳເອົາຜົນປະໂຫຍດມາສູ່ສອງປະເທດ. ພ້ອມນີ້, ຍັງໄດ້ສະແດງຂອບໃຈຕໍ່ການຕ້ອນຮັບອັນອົບອຸ່ນ ແລະ ເປັນກັນເອງຄັ້ງນີ້.

ພະນະທ່ານ ສີສະຫວາດ ອິນພະຈັນ, ພົບປະສອງຝ່າຍຮ່ວມກັບ ທ່ານ Daniel Kritenbrink, ຜູ້ຊ່ວຍລັດຖະມົນຕີກະຊວງການຕ່າງປະເທດ

ໃນຕອນເຊົ້າຂອງວັນທີ 1 ກໍລະກົດ 2022, ພະນະທ່ານ ສີສະຫວາດ ອິນພະຈັນ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປລາວ ປະຈຳສະຫະລັດອາເມລິກາ ແລະ ການາດາ ໄດ້ເຂົ້າພົບປະກັບທ່ານ Daniel Kritenbrink, ຜູ້ຊ່ວຍລັດຖະມົນຕີກະຊວງການຕ່າງປະເທດ, ຮັບຜິດຊອບພາກພື້ນອາຊີ-ປາຊີຟິກ ທີ່ ກະຊວງການຕ່າງປະເທດອາເມລິກາ, ເຊິ່ງການພົບປະດັ່ງກ່າວ ເປັນການພົບປະຄັ້ງທຳອິດ ພາຍຫຼັງທີ່ພະນະທ່ານ ສີສະຫວາດ ອິນພະຈັນ, ໄດ້ເຂົ້າຢ້ຽມຂໍ່ານັບ ແລະ ຖ່າຍຮູບເປັນທີ່ລະນຶກຮ່ວມກັບ ທ່ານ ໂຈ ໄບເດັນ, ປະທານາທິບໍດີອາເມລິກາ ທີ່ ທຳນຽບປະທານາທິບໍດີ (ທຳນຽບຂາວ) ໃນວັນທີ 13 ມິຖຸນາ 2022, ເຊິ່ງຖືວ່າເປັນການສຳເລັດຂັ້ນຕອນການຍື່ນສານຕາຕັ້ງ ແລະ ຮັບຮອງເປັນເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປລາວ ປະຈຳສະຫະລັດອາເມລິກາ.

ໃນລະຫວ່າງການພົບປະ, ສອງຝ່າຍໄດ້ປຶກສາຫາລືຫຼາຍບັນຫາ ເພື່ອສົ່ງເສີມການພົວພັນຮ່ວມມືສອງຝ່າຍ ໂດຍສະເພາະແມ່ນ ດ້ານການສຶກສາ, ສາທາລະນະສຸກ, ການຄົ້ນຫາສິ່ງເສດເຫຼືອຂອງທະຫານອາເມລິກາ ແຕ່ປາງສົງຄາມ, ການຮ່ວມມືດ້ານປ້ອງກັນຊາດ, ການຕ້ານການຄ້າຢາເສບຕິດ, ການເກັບກູ້ລະເບີດບໍທັນແຕກຢູ່ລາວ.  ພະນະທ່ານ ສີສະຫວາດ ອິນພະຈັນ, ໄດ້ຖືໂອກາດດັ່ງກ່າວ ສະແດງຄວາມຂອບໃຈມາຍັງ ທ່ານ Daniel Kritenbrink ກໍຄືລັດຖະບານອາເມລິກາ ທີ່ສືບຕໍ່ໃຫ້ການສະໜັບສະໜູນຊ່ວຍເຫຼືອ ສປປລາວ ໃນຂະແໜງການຕ່າງໆ ໄລຍະຜ່ານມາ ໂດຍສະເພາະບັນຫາຂຸດຄົ້ນທໍາລາຍລະເບີດບໍ່ທັນແຕກ ແລະ ການຊ່ວຍເຫຼືອວັກແຊັງຕ້ານໂຄວິດ-19. ພ້ອມນີ້, ໄດ້ຢືນຢັນວ່າ ບູລິມະສິດໃນໄລຍະການເປັນເອກອັກຄະລັດຖະທູດແຫ່ງ ສປປລາວ ປະຈຳສ.ອາເມລິກາ ແມ່ນ ການເສີມຂະຫຍາຍການຮ່ວມມືດ້ານເສດຖະກິດ ໃນດ້ານທີ່ສອງຝ່າຍມີທ່າແຮງຮ່ວມກັນເຊັ່ນ: ການພັດທະນາດ້ານໂຄງລ່າງພື້ນຖານ, ດ້ານພະລັງງານສະອາດ, ເຕັກໂນໂລຊີ, ທ່ອງທ່ຽວ,​ ການສົ່ງເສີມການພົວພັນລະຫວ່າງປະຊາຊົນສອງປະເທດ ລວມທັງການແກ້ໄຂບັນຫາການເນລະເທດຜູ້ທີ່ເຮັດຜິດກົດໝາຍອາເມລິກາ ທີ່ໄດ້ຮັບການຢັ້ງຢືນຖືກຕ້ອງວ່າ ເປັນຄົນເຊື້ອຊາດລາວກັບຄືນສປປລາວ.

 ທ່ານ Daniel Kritenbrink, ໄດ້ສະແດງຄວາມຊົມເຊີຍຕໍ່ການແຕ່ງຕັ້ງ ແລະ ຮັບໜ້າທີ່ເປັນເອກອັກຄະລັດຖະທູດແຫ່ງ ສປປລາວ ປະຈຳສ.ອາເມລິກາຂອງ ພະນະທ່ານ ສີສະຫວາດ ອິນພະຈັນ ແລະ ເຫັນດີສະໜັບສະໜູນຄຳເຫັນຂອງທ່ານເອກອັກຄະລັດຖະທູດ ໃນການສົ່ງເສີມ ແລະ ຮັດແໜ້ນສາຍພົວພັນລະຫວ່າງສອງປະເທດ ໂດຍສະເພາະແມ່ນການຊຸກຍູ້ໃຫ້ພາກສ່ວນຕ່າງໆ ຂອງອາເມລິກາ ໃຫ້ມີຄວາມເຂົ້າອົກເຂົ້າໃຈຕໍ່ການພົວພັນຮ່ວມມືທັງໃນຂອບສອງຝ່າຍ ແລະ ຫຼາຍຝ່າຍໃຫ້ມີການຂະຫຍາຍຕົວຍິ່ງຂຶ້ນ. ພ້ອມນີ້, ໄດ້ສະແດງຄວາມເຫັນດີ ແລະ ໄດ້ໃຫ້ຄຳໝັ້ນສັນຍາວ່າ ຈະໃຫ້ການສະໜັບສະໜູນການປະຕິບັດໜ້າທີ່ຂອງຝ່າຍລາວ ລວມທັງການຊຸກຍູ້ການຈັດຕັ້ງປະຕິບັດແນວທາງການຮ່ວມມືໃນອະນາຄົດຕາມທີ່ຝ່າຍລາວໄດ້ຍົກຂຶ້ນ ແລະ ການແກ້ໄຂບັນຫາທີ່ຄົງຄ້າງຕ່າງໆຮ່ວມກັນ.

ທ່ານ ສີສະຫວາດ ອິນພະຈັນ, ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປປລາວ ປະຈຳ ອາເມລິກາ ແລະ ການາດາ ເຂົ້າຢ້ຽມຂໍ່ານັບ ແລະ ຖ່າຍຮູບຮ່ວມກັບ ທ່ານ ໂຈ ໄບເດັນ, ປະທານາທິບໍດີອາເມລິກາ

ໃນຕອນບ່າຍ ຂອງວັນທີ 13 ມິຖຸນາ 2022, ທ່ານ ສີສະຫວາດ ອິນພະຈັນ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປລາວ ປະຈຳສະຫະລັດອາເມລິກາ ແລະ ການາດາ ໄດ້ເຂົ້າຢ້ຽມຂໍ່ານັບ ແລະ ຖ່າຍຮູບເປັນທີ່ລະນຶກຮ່ວມກັບ ທ່ານ ໂຈ ໄບເດັນ, ປະທານາທິບໍດີອາເມລິກາ ທີ່ ທຳນຽບປະທານາທິບໍດີ (ທຳນຽບຂາວ) ຮ່ວມກັບບັນດາ ທູດຕ່າງປະເທດ ປະມານ 50 ປະເທດ. ພິທີດັ່ງກ່າວ ແມ່ນຖືກຈັດຂື້ນ ແທນການຍື່ນສານດ້ວຍຕົນເອງ ຍ້ອນການເເພ່ລະບາດ ຂອງພະຍາດ ໂຄວິດ-19 ເພື່ອເປັນກຽດໃຫ້ແກ່ບັນດາທູດ ທີ່ໄດ້ສຳເລັດການຍື່ນສານຕາຕັ້ງ ຜ່ານກະຊວງການຕ່າງປະເທດອາເມລິກາ ແລະ ໄດ້ຮັບການຮັບຮອງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມ ປະຈຳສະຫະລັດອາເມລິກາ ໂດຍ ທຳນຽບປະທານາທິບໍດີ ເປັນທີ່ຮຽບຮ້ອຍແລ້ວ, ເຊິ່ງທຳນຽບປະທານາທິບໍດີໄດ້ຈັດສົ່ງຮູບໃຫ້ບັນດາສະຖານທູດ ທີ່ກ່ຽວຂ້ອງຕ່າງໆ ໃນຕອນແລງຂອງວັນທີ 23 ມິຖຸນາ 2022 ຜ່ານມາ.

President Joe Biden receives Ambassadors Credentials from Laos Ambassador to United States Sisavath Inphachanh Monday, June 13, 2022, in the Oval Office of the White House. (Official White House Photo by Adam Schultz)

          ໃນພິທີອັນມີກຽດນີ້,  ທ່ານ ເອກອັກຄະລັດຖະທູດ ໄດ້ຖືກຕ້ອນຮັບຢ່າງສົມກຽດ ຈາກ ທ່ານ ປະທານາທິບໍດີ ໂຈ ໄບເດັນ ແລະ ໄດ້ຮັບການອວຍພອນໃຫ້ປະຕິບັດໜ້າທີ່ໃນຖານະ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປລາວ ປະຈຳສະຫະລັດອາເມລິກາ ດ້ວຍຜົນສຳເລັດອັນຈົບງາມ, ເຊິ່ງທ່ານ ເອກອັກຄະລັດຖະທູດ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ຄຳອວຍພອນອັນຈົບງາມ ແລະ ໄດ້ຝາກຄວາມຢື້ຢາມຖາມຂ່າວຈາກ ທ່ານ ປະທານປະເທດແຫ່ງ ສປປລາວ ມາຍັງ ທ່ານ ປະທານາທິບໍດີ ໂຈ ໄບເດັນ. ພ້ອມນີ້, ກໍ່ສະແດງຄວາມຫວັງວ່າ ທ່ານ ປະທານາທິບໍດີ ໂຈ ໄບເດັນ ຈະໃຫ້ຄວາມຊ່ວຍເຫຼືອ ແກ່ ທ່ານ ເອກອັກຄະລັດຖະທູດ ຕະຫຼອດໄລຍະປະຕິບັດໜ້າທີ່ ເປັນເອກອັກຄະລັດຖະທູດຜູ້ມີອຳນາດເຕັມແຫ່ງ ສປປລາວ ປະຈຳ ສະຫະລັດອາເມລິກາ ເພື່ອເສີມຂະຫຍາຍ ແລະ ຮັດແໜ້ນສາຍພົວພັນຮ່ວມມືລະຫວ່າງສອງປະເທດໃຫ້ສືບຕໍ່ຂະຫຍາຍຕົວ ແລະ ແຕກດອກອອກຜົນຍິ່ງໆ ຂື້ນກວ່າເກົ່າ ເພື່ອນຳເອົາຜົນປະໂຫຍດສຸງສຸດ ມາສູ່ ປະຊາຊົນຂອງສອງປະເທດ.

          ພາຍຫຼັງສຳເລັດພິທີດັ່ງກ່າວ, ທ່ານ ສີສະຫວາດ ອິນພະຈັນ, ເອກອັກຄະລັດຖະທູດວິສາມັນຜູ້ມີອຳນາດ ເຕັມ ແຫ່ງ ສປປລາວ ປະຈຳສະຫະລັດອາເມລິກາ ຈະໄດ້ເຄື່ອນໄຫວ ແລະ ພົບປະກັບພາກສ່ວນ ທີ່ກ່ຽວຂ້ອງຕ່າງໆ ຂອງອາເມລິກາ ເພື່ອຊຸກຍູ້ການຮ່ວມມືສອງຝ່າຍ ໃຫ້ຂະຫຍາຍຕົວ ແລະ ແກ້ໄຂບັນຫາ ທີ່ຍັງຄົງຄ້າງຮ່ວມກັນ ເປັນຕົ້ນແມ່ນ ຈະພົບປະກັບບັນດາການນຳ ແລະ ກົມກ່ຽວຂ້ອງ ຂອງກະຊວງການຕ່າງປະເທດອາເມລິກາ, ສະພາຄວາມໝັ້ນຄົງແຫ່ງຊາດ, ທຳນຽບຂາວ, ບັນດາສະມາຊິກສະພາ, ຫົວໜ້າອົງການຊ່ວຍເຫຼືອເພື່ອການພັດທະນາຂອງອາເມລິກາ (USAID),ຫົວໜ້າອົງການເກັບກູ້ສິ່ງເສດເຫຼືອຂອງທະຫານອາເມລິກາທີ່ຫາຍສາບສູນແຕ່ປາງສົງຄາມ (POW/MIA),  ພາກສ່ວນທຸລະກິດຕ່າງໆ ຂອງລັດຖະບານ ແລະ ເອກະຊົນ ແລະ ພາກສ່ວນອື່ນໆ ທີ່ສຳຄັນຕ່າງໆ.

ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳອາເມລິກາ ແລະ ການາດາ ຈັດການແຂ່ງຂັນກິລາຕີກ໋ອບມິດຕະພາບປະຈຳປີຄັ້ງທີ 10

ໃນວັນທີ 31 ກໍລະກົດ 2021, ສະຖານເອກອັກຄະລັດຖະທູດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳສະຫະລັດອາເມລິກາ ແລະ ການາດາ ທີ່ ນະຄອນຫຼວງວໍຊິງຕັນ, ດີຊີ, ໄດ້ຮ່ວມກັບສະມາຄົມນັກກ໋ອບພີ່ນ້ອງເຊື້ອຊາດລາວຢູ່ລັດໃກ້ຄຽງຄື: ລັດວໍຊິງຕັນ ດີຊີ, ລັດເວີຈີເນຍ, ລັດແມ່ລີແລນ, ລັດເດີລາແວ ແລະ ລັດເພນເຊີເວເນຍ ໄດ້ຈັດການແຂ່ງຂັນກີລາຕີກ໋ອບມິດຕະພາບປະຈຳປີຄັ້ງທີ 10 ຂອງສະຖານທູດຂຶ້ນ ເພື່ອຊິງຂັນລາງວັນຂອງທ່ານ ຄຳພັນ ອັ່ນລາວັນ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສ.ອາເມລິກາ ແລະ ການາດາ ໂດຍມີພີ່ນ້ອງຄົນເຊື້ອຊາດລາວຈາກບັນດາລັດຕ່າງໆ ໃນສ.ອາເມລິກາ, ແຂກຕ່າງປະເທດຈາກສະຖານທູດປະເທດສະມາຊິກອາຊຽນຈໍານວນໜຶ່ງ, ຜູ້ຕາງໜ້າຈາກສຳນັກງານຜູ້ຕາງໜ້າຖາວອນ ແຫ່ງ ສປປ ລາວ ປະຈຳອົງການສະຫະປະຊາຊາດ ທີ່ ນິວຢອກ ແລະ ພາກສ່ວນອື່ນໆ ເຂົ້າຮ່ວມ ລວມທັງໝົດປະມານ 100 ກວ່າຄົນ.

ພິທີເປີດງານແຂ່ງຂັນກິລາຕີກ໋ອບມິດຕະພາບຢ່າງເປັນທາງການ ໄດ້ຈັດຂຶ້ນໃນຕອນເຊົ້າຂອງວັນດັ່ງກ່າວ      ໂດຍ ພະນະທ່ານ  ຄຳພັນ ອັ່ນລາວັນ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳສ.ອາເມລິກາ ແລະ ການາດາ ໃຫ້ກຽດເປີດພິທີ ແລະ ໄດ້ກ່າວຈຸດປະສົງຂອງການຈັດງານຄັ້ງນີ້ ເພື່ອເປັນການສ້າງຂະບວນການສືບຕໍ່ຮັດແໜ້ນຄວາມສາມັກຄີ ແລະ ຄວາມຮັກແພງອັນໃກ້ຊິດລະຫວ່າງ ບັນດານັກກິລາກ໋ອບຈາກລັດຕ່າງໆ ກໍຄື ລະຫວ່າງພີ່ນ້ອງຄົນເຊື້ອຊາດລາວໃນອາເມລິກາກັບສະຖານທູດລາວ ແລະ ສຳນັກງານຜູ້ຕາງໜ້າຖາວອນແຫ່ງ        ສປປ ລາວ ປະຈຳອົງການ ສປຊ ໃຫ້ນັບມື້ ນັບແໜ້ນແຟ້ນຍິ່ງໆຂຶ້ນກວ່າເກົ່າ ພາຍຫຼັງທີ່ໄດ້ງົດເວັ້ນການຈັດກິດຈະກຳຕ່າງໆຮ່ວມກັນມາໄລຍະໜຶ່ງ ຍ້ອນການແພ່ລະບາດຂອງພະຍາດໂຄວິດ-19 ໃນປີຜ່ານມາ.

ໃນຕອນແລງ ຂອງວັນດຽວກັນ, ໄດ້ມີການຈັດງານລ້ຽງອາຫານຄໍ່າຂຶ້ນທີ່ສະຖານທູດລາວ ເພື່ອເປັນການຊົມເຊີຍການແຂ່ງຂັນກ໋ອບມິດຕະພາບ ແລະ ມອບລາງວັນໃຫ້ຜູ້ທີ່ໄດ້ຮັບໄຊຊະນະໃນການແຂ່ງຂັນ ໂດຍແມ່ນທ່ານ ເອກອັກຄະລັດຖະທູດ ແຫ່ງ ສປປ ລາວ ໃຫ້ກຽດຂຶ້ນມອບລາງວັນ ແກ່ຜູ້ໄດ້ຮັບໄຊຊະນະໃນການແຂ່ງຂັນ. ໃນໂອກາດນີ້, ທ່ານເອກອັກຄະລັດຖະທູດໄດ້ຖືໂອກາດນີ້ ໂອ້ລົມພີ່ນ້ອງຄົນເຊື້ອຊາດລາວ ໂດຍໄດ້ແຈ້ງໃຫ້ຊາບກ່ຽວກັບຜົນສຳເລັດທີ່ພົ້ນເດັ່ນໃນການສ້າງສາ ແລະ ພັດທະນາ ສປປ ລາວ ກໍຄືການພັດທະນາເສດຖະກິດ-ສັງຄົມ ແລະ ການຄວບຄຸມ ແລະ ສະກັດກັ້ນການແພ່ລະບາດຂອງພະຍາດໂຄວິດ-19 ຢູ່ລາວ. ພ້ອມນີ້, ຍັງໄດ້ແຈ້ງໃຫ້ຊາບເຖິງຄວາມເອົາໃຈໃສ່, ຄວາມເປັນຫ່ວງເປັນໄຍ ແລະ ການໃຫ້ຄວາມຊ່ວຍເຫຼືອຂອງລັດຖະບານຕໍ່ຄົນລາວທີ່ຕົກຄ້າງຢູ່ຕ່າງປະເທດ ໂດຍສະເພາະຢູ່ ສ.ອາເມລິກາ ແລະ ການາດາ ໃຫ້ສາມາດເດີນທາງກັບລາວ. ພ້ອມນີ້, ສະຖານທູດຍັງໄດ້ຊ່ວຍອຳນວຍຄວາມສະດວກໃຫ້ພີ່ນ້ອງຄົນເຊື້ອຊາດລາວທີ່ມີຄວາມຈຳເປັນເດີນທາງເຂົ້າ ສປປ ລາວ ເພື່ອແກ້ໄຂບັນຫາຈຳເປັນຕ່າງໆ. ທ່ານເອກອັກຄະລັດຖະທູດ ຍັງໄດ້ອະທິບາຍ ແລະ ຕອບຂໍ້ສົນໃຈ ຂອງພີ່ນ້ອງຄົນເຊື້ອຊາດລາວໃນບັນຫາຕ່າງໆ ເປັນຕົ້ນແມ່ນ ການເຂົ້າ-ອອກ ສປປ ລາວ ໃນຊ່ວງໄລຍະການແພ່ລະບາດຂອງພະຍາດໂຄວິດ-19,​ ການຂໍຢູ່ລາວຖາວອນ ແລະ ສິດຕ່າງໆຂອງຄົນເຊື້ອຊາດລາວຢູ່ຕ່າງປະເທດ ແລະ ບັນຫາອື່ນໆ, ເຊິ່ງເຫັນໄດ້ວ່າ ພີ່ນ້ອງຄົນເຊື້ອຊາດລາວທີ່ໄດ້ເຂົ້າຮ່ວມງານແມ່ນມີຄວາມດີໃຈ ແລະ ເພິ່ງພໍໃຈ ຕໍ່ການອະທິບາຍ ແລະ ຕ້ອນຮັບຢ່າງອົບອຸ່ນຈາກສະຖານທູດລາວໃນຄັ້ງນີ້. ພ້ອມນີ້, ທ່ານທູດຍັງໄດ້ສະແດງຄວາມຂອບໃຈຕໍ່ພາກສ່ວນຕ່າງໆຂອງພີ່ນ້ອງເຊື້ອຊາດລາວ ທີ່ໄດ້ປະກອບສ່ວນສະຕິປັນຍາ, ເຫື່ອແຮງ, ວັດຖຸ ລວມທັງວົງດົນຕີ ກໍຄືອາຫານການກິນຕ່າງໆ ໃຫ້ແກ່ງານຄັ້ງນີ້ປະສົບຜົນສໍາເລັດຢ່າງຈົບງາມ ແລະ ມີບັນຍາກາດມ່ວນຊື່ນເປັນຢ່າງດີ.

 

ການຈັດງານດັ່ງກ່າວຂ້າງເທິ່ງໃນຄັ້ງນີ້ ແມ່ນເພື່ອຮັດແໜ້ນຄວາມສາມັກຄີ ແລະ ຮັກແພງ ລະຫວ່າງ ພີ່ນ້ອງຄົນເຊື້ອຊາດລາວ, ສະຖານທູດລາວ ແລະ ສຳນັກງານຜູ້ຕາງໜ້າຖາວອນແຫ່ງ ສປປ ລາວ ທີ່ນິວຢອກ ແລະ ຖືວ່າເປັນຄັ້ງທຳອິດທີ່ຈັດຂຶ້ນ ນັບແຕ່ມີການແພ່ລະບາດຂອງພະຍາດໂຄວິດ-19 ໃນຕົ້ນປີ 2020 ເປັນຕົ້ນມາ ແລະ ຖືວ່າປະສົບຜົນສຳເລັດຕາມຈຸດປະສົງລະດັບຄາດໝາຍໃນການສືບຕໍ່ຮັດແໜ້ນ ແລະ ເສີມຂະຫຍາຍຄວາມສາມັກຄີ, ຄວາມຮັກແພງ ແລະ ການຮ່ວມມືທີ່ດີລະຫວ່າງທຸກໆ ຝ່າຍທີ່ກ່ຽວຂ້ອງ, ທັງໄດ້ປະກອບສ່ວນໃຫ້ພີ່ນ້ອງຄົນເຊື້ອຊາດລາວຢູ່ ສ.ອາເມລິກາ ເຫັນໄດ້ແນວທາງນະໂຍບາຍອັນຖືກຕ້ອງຂອງພັກ-ລັດ ກໍຄືຜົນສຳເລັດໃນການສ້າງສາພັດທະນາປະເທດຊາດໃນໄລຍະຜ່ານມາ ແລະ ມີຄວາມສົນໃຈ ແລະ ປະກອບສ່ວນ ຊ່ວຍພັດທະນາ ສປປລາວນັບມື້ນັບເພີ່ມຂຶ້ນ.  

ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ອວຍພອນປີໃໝ່ລາວ ພສ 2564

ພີ່ນ້ອງຮ່ວມຊາດທີ່ຮັກແພງທັງຫລາຍ.

ໃນໂອກາດສົ່ງທ້າຍປີເກົ່າປີຊວດ ແລະຕ້ອນຮັບປີໃໝ່ປີສະຫລຸພສ 2564 ຂ້າພະເຈົ້າຂໍຖືໂອກາດອັນເລີກງາມຍາມດີ ວັນທີ່ເປັນມຸງຄຸນນີ້ສົ່ງຄຳອວຍພອນອັນປະ ເສີດມາຍັງພີ່ນ້ອງຮ່ວມຊາດ ຕະຫລອດເຖິງພີ່ນນ້ອງເຊື້ອຊາດລາວທີ່ອາໃສຢູ່ຕ່າງປະເທດ ກໍ່ຄືຊາວຕ່າງປະ ເທດທີ່ກຳລັງປະຕິບັດໜ້າທີ່ ແລະທຳມາຫາກິນຢູ່ ສປປລາວ ຂໍໃຫ້ທຸກໆທ່ານປາສະຈາກໂລກໄພໄຂ້ ເຈັບ, ປອດໄພຈາກພະຍາດໂຄວິດ19 ມີພາລະນາໄມສົມບູນ ສຸກກາຍສຸກໃຈ ແລະມີຄວາມຈະເລີນກ້າວໜ້າທຸກປະການ.

ພີ່ນ້ອງຮ່ວມຊາດທີ່ຮັກແພງທັງຫລາຍ ໃນປີເກົ່າ ພສ 2563 ທີ່ພວມຜ່ານພົ້ນໄປນັ້ນ ເວົ້າລວມແລ້ວກໍ່ເປັນອີກປີໜື່ງແຫ່ງຄວາມພະຍາຍາມບຸກບືນຂອງທົ່ວພັກທົ່ວລັດ ແລະທົ່ວປວງຊົນລາວທັງຊາດໃນການອອກເຫື່ອເທແຮງສຸມກຳລັງຂອງຕົນເຂົ້າໃນການພັດທະນາ, ສ້າງສາປະເທດຊາດອັນແສນຮັກຂອງພວກເຮົາຢ່າງເປັນຂະບວນຟົດຟື້ນຢ່າງສະເໝີມາ, ເຫດການທີ່ພົ້ນເດັ່ນກວ່າໝູ່ແມ່ນທົ່ວພັກ ທົ່ວລັດ ແລະທົ່ວປວງຊົນລາວໄດ້ເຂົ້າຮ່ວມການກຽມໃຫ້ແກ່ການດຳເນີນກອງປະຊຸມໃຫ່ຍຄັ້ງທີ 11 ຂອງພັກ

ຈາກນັ້ນປວງຊົນລາວທັງຊາດ ຜູ້ທີ່ມີສິດຕາມລັດຖະທຳມະນູນ ແລະກົດໝາຍໄດ້ພ້ອມພຽງຮຽງໜ້າກັນອອກໃຊ້ສິດຂອງຕົນໃນການປ່ອນບັດເລືອກຕັ້ງເອົາສະມາຊິກສະພາແຫ່ງຊາດຊຸດທີ 9 ແລະສະມາ ຊິກສະພາປະຊາຊົນຂັ້ນແຂວງຊຸດທີ 2 ຊື່ງຜົນສໍາເລັດຂອງການເລືອກຕັ້ງດັ່ງກ່າວໄດ້ສືບຕໍ່ຍົກສູງ ແລະເສີມຂະຫຍາຍສິດປະຊາທິປະໄຕ, ສິດເປັນເຈົ້າຂອງປະຊາຊົນລາວບັນດາເຜົ່າຢ່າງເຕັມສ່ວນ ຕໍ່ຈາກນັ້ນສະພາແຫ່ງຊາດກໍ່ໄດ້ເປີດກອງປະຊຸມຄັ້ງປະຖົມມະລືກຂອງຕົນ ແລະໄດ້ສຳເລັດລົງຢ່າງຈົບງາມ ໂດຍມີການຕົກລົງຮັບຮອງເອົາບັນດາເນື້ອໃນທີ່ສຳຄັນຂອງຊາດເຮົາ,

ເຫດການດັ່ງກ່າວໄດ້ສະແດງໃຫ້ເຫັນຄວາມເຕີບໃຫ່ຍຂະຫຍາຍຕົວຂອງປະເທດເຮົາໃນການຍົກລະດັບສະຕິຕື່ນຕົວທາງການເມືອງ, ນໍ້າໃຈຮັກຊາດ ແລະນໍ້າໃຈແຫ່ງຄວາມສາມັກຄີເປັນປຶກແຜ່ນພາຍໃນຊາດ ສະແດງເຖິງຄວາມເຊື່ອໝັ້ນ ແລະ ຄວາມໄວ້ວາງໃຈຂອງປະຊາຊົນລາວບັນດາເຜົ່າ ຕໍ່ການນໍາພາຂອງພັກ, ລັດ ແລະ ຕໍ່ລະບອບປະຊາທິ ປະໄຕ ປະຊາຊົນຂອງພວກເຮົາ.

ພີ່ນ້ອງຮ່ວມຊາດທີ່ຮັກແພງທັງຫລາຍ. ເຖິງວ່າປີຜ່ານມາປະເທດເຮົາຈະປະເຊີນໜ້າກັບຄວາມຫຍຸ້ງຍາກ ແລະສີ່ງທ້າທາຍຫລາຍຢ່າງທີ່ກະທົບໃສ່ປະເທດຂອງພວກເຮົາກໍ່ຕາມ

ແຕ່ພາຍໃຕ້ການຊີ້ນໍາໆພາຂອງພັກ, ລັດ ແລະການປະກອບສ່ວນອັນຕັ້ງໜ້າຂອງປະຊາຊົນລາວໃນທົ່ວປະເທດ ພວກເຮົາມີຄວາມພາກພູມໃຈທີ່ເຫັນວ່າ ປະເທດລາວສາມາດປະຕິບັດຄາດໝາຍສູ້ຊົນຂອງແຜນພັດທະນາເສດຖະກິດ-ສັງຄົມທີ່ວາງໄວ້ ດ້ວຍຜົນສຳເລັດທີ່ສຳຄັນຈໍານວນບໍ່ໜ້ອຍ ເປັນຕົ້ນປະເທດເຮົາສືບຕໍ່ມີສະເຖ່ຍລະພາບທາງການເມືອງ, ມີຄວາມສະຫງົບຮຽບຮ້ອຍທາງສັງຄົມ, ເສດຖະກິດມີການຂະຫາຍຕົວຢ່າງຕໍ່ເນື່ອງ, ວັດທະນາທຳສັງຄົມໄດ້ຮັບການພັດທະນາຢ່າງເປັນລໍາດັບ, ລະບົບການເມືອງການປົກຄອງໄດ້ຮັບການປັບປຸງໃຫ້ມີຄວາມໜັກແໜ້ນເຂັ້ມແຂງກວ່າເກົ່າ, ປະຊາຊົນລາວເຮົາມີຄວາມສາ ມັກຄີປອງດອງ, ຊີວິດການເປັນຢູ່ທາງດ້ານວັດຖຸ ແລະຈິດໃຈຂອງປະຊາຊົນກໍ່ໄດ້ຮັບການປັບປຸງແກ້ໄຂໃຫ້ດີຂື້ນຢ່າງບໍ່ຢຸດຢັ້ງ ເກີດມີຄອບຄົວຕົວແບບທີ່ພົ້ນທຸກນັບມື້ນັບຫລາຍ, ການພົວພັນຮ່ວມມືກັບຕ່າງປະເທດ ແລະອົງການຈັດຕັ້ງສາກົນສືບຕໍ່ໄດ້ຮັບການເສີມຂະຫຍາຍຢ່າງມີປະສິດທິຜົນ ແລະຖານະບົດບາດອິດທິພົນຂອງ ສປປລາວ ໄດ້ຮັບການຍົກສູງຂື້ນໃນເວທີພາກພື້ນ ແລະສາກົນ

ນະໂອກາດອັນເລີກງາມຍາມດີ ແລະ ເປັນສິຣິມຸງຄຸນນີ້ ຂ້າພະເຈົ້າຕາງໜ້າໃຫ້ຄະນະບໍລິຫານງານສູນກາງພັກ ລັດຖະບານ ແລະໃນນາມສ່ວນຕົວ ຂໍສະແດງຄວາມຍ້ອງຍໍຊົມເຊີຍ ແລະ ຂອບອົກຂອບໃຈຢ່າງຈິງໃຈມາຍັງສະມາຊິກພັກ, ພະນັກງານ, ທະຫານຕໍາຫລວດ, ແພດໝໍ, ຄູອາຈານ, ນັກທຸລະກິດ, ຜູ້ກອບການ ຕະຫລອດເຖິງ ພີ່ນ້ອງຮ່ວມຊາດທຸກທົ່ວໜ້າ, ພີ່ນ້ອງເຊື້ອຊາດລາວທີ່ຢູ່ຕ່າງປະເທດ ລວມທັງບັນດາປະເທດເພື່ອນມິດ, ອົງການຈັດຕັ້ງສາກົນທີ່ໄດ້ປະກອບສ່ວນເຂົ້າໃນພາລະກິດລວມຂອງຊາດເຮົາໃນແຕ່ລະດ້ານຢ່າງຕັ້ງໜ້າ ໂດຍສະເພາະໃນສະໜາມຮົບຕໍ່ສູ້ອັນດຸເດືອດຂອງການປ້ອງກັນສະກັດກັ້ນ ຕ້ານ ແລະແກ້ໄຂພະຍາດໂຄວິດ19 ຈົນເຮັດໃຫ້ປະເທດເຮົາມີຜູ້ຕິດເຊື້ອສະສົມຈໍານວນຈໍາກັດ ແລະບໍ່ທັນມີຜູ້ເສຍຊີວິດ.

ພີ່ນ້ອງຮ່ວມຊາດທີ່ຮັກແພງທັງຫລາຍ. ປີສະຫລຸປີ 2564 ທີ່ພວມກ້າວເຂົ້າມາເປັນປີທີ່ມີຄວາມໝາຍສຳຄັນສຳລັບ ສປປລາວ ຊື່ງພວມເຮົາຈະໄດ້ພ້ອມກັນສຸມໃສ່ຈັດຕັ້ງຜັນຂະຫຍາຍໜ້າທີ່ວຽກງານຫລາຍຢ່າງທີ່ສຳຄັນຂອງພັກ ແລະຂອງຊາດ, ແກ້ໄຂຄວາມທຸກຍາກຂອງປະຊາຊົນ ໄດ້ຈັດຕັ້ງປະຕິບັດເປົ້າໝາຍສູ້ຊົນພັດທະນາປະເທດເຮົາໃຫ້ພົ້ນອອກຈາກສະຖານະພາບດ້ອຍພັດທະນາ ເພື່ອກ້າວໄປສູ່ບາດກ້າວຕໍ່ໄປທີ່ໜັກແໜ້ນ, ພັດທະນາຕາມທິດສີຂຽວ ແລະຍືນຍົງແຕ່ນີ້ເຖິງປີ 2030

ເພື່ອໃຫ້ບັນລຸເປົ້າໝາຍດັ່ງກ່າວປະຊາຊົນລາວໃນທົ່ວປະເທດ ຕ້ອງໄດ້ພ້ອມກັບພັກ ແລະລັດເຮົາ ຮ່ວມແຮງຮ່ວມໃຈກັນອອກແຮງສູ້ຊົນ, ຈັດຕັ້ງປະຕິບັດແນວທາງນະໂຍບາຍທີ່ກອງປະຊຸມໃຫ່ຍຄັ້ງທີ 11 ຂອງພັກ ແລະແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ຂອງລັດໃຫ້ປະກົດຜົນເປັນຈິງ ສ້າງວິຖີຊີວິດໃໝ່, ສ້າງການຫັນປ່ຽນໃໝ່ໃນການທຳມາຫາກິນ, ການດຳລົງຊີວິດທີ່ກ້າວໜ້າທັນສະໄໝຂື້ນ ກຳຈັດປັດເປົ່າສີ່ງຫຍໍ້ທໍ້ໃນສັງຄົມເຮົາໃຫ້ກາຍເປັນສັງຄົມທີ່ປອດໃສ, ສະອາດ, ຈົບງາມ ເປັນສັງຄົມີ່ທໂອບເອື້ອອາລີ, ຍຸຕິທຳ ແລະ ສີວິໄລ ຕາມມູນເຊື້ອອັນດີງາມຂອງຊາດ ທັງໃຫ້ມີຄວາມປະດິດສ້າງ ແລະກ້າວໜ້າທັນຍຸກທັນເຫດການອີກດ້ວຍ.

ພີ່ນ້ອງຮ່ວມຊາດທີ່ຮັກແພງທັງຫລາຍ! ກ້າວເຂົ້າສູ່ປີໃໝ່ປີສະຫລຸ ພສ 2564 ນີ້ ຂໍຖືໂອກາດທີ່ເປັນມຸງຄຸນ ແລະເລີກງາມຍາມດີນີ້ ຂ້າພະເຈົ້າຮຽກຮ້ອງມາຍັງພີ່ນ້ອງຮ່ວມຊາດ ຈົ່ງພ້ອມກັນຮັກສາ ແລະເສີມຂະຫຍາຍມູນເຊື້ອອັນດີງາມຂອງຊາດເຮົາ ເພີ່ມທະວີຄວາມສາມັກຄີອັນເປັນປຶກແຜ່ນແໜ້ນໜາ

ພ້ອມກັນຜ່ານຜາຄວາມຫຍຸ້ງຍາກ ແລະສີ່ງທ້າທາຍທົດສອບນາໆປະການທີ່ຈະເກີດຂື້ນໃນປີທີ່ຈະມາເຖິງນີ້ ພ້ອມພາກັນສ້າງສາພັດທະນາປະເທດເຮົາໃຫ້ກ້າວໜ້າຈະເລີນຂື້ນຢ່າງບໍ່ຢຸດຢັ້ງ ພ້ອມກັນນີ້ຂ້າ ພະເຈົ້າຂໍຝາກຄວາມຄິດເຖິງພີ່ນ້ອງເຊື້ອຊາດລາວຢູ່ຕ່າງປະເທດ ຈົ່ງພ້ອມກັນອວຍໜ້າມາຫາປະເທດທີ່ເປັນບ້ານເກີດຂອງເຊື້ອເຜົ່າພົງພັນຂອງຕົນ ເພື່ອຮ່ວມກັບປະຊາຊົນຢູ່ພາຍໃນປະເທດ ສ້າງສາ ແລະພັດ ທະນາປະເທດຊາດອັນແສນຮັກຂອງພວກເຮົາໃຫ້ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ ມີປະຊາທິປະໄຕ ຍຸຕິທຳ ແລະສີວິໄລຍີ່ງໆຂື້ນ

ໃນໂອກາດນີ້ຂ້າພະເຈົ້າຂໍອວຍພອນໃຫ້ຊາວຕ່າງປະເທດ ແລະຊາວຕ່າງດ້າວທີ່ກຳລັງດຳລົງຊີວິດຢູ່ ສປປລາວ ຈົ່ງມີຄວາມສຸກ ມີຄວາມຈະເລີນຕະຫລອດປີໃໝ່ ພສ 2564 ນີ້ ທ້າຍສຸດນີ້ຂໍອວຍພອນໃຫ້ປີໃໝ່ປີສະຫລຸ ພສ 2564 ຈົ່ງເປັນປີທີ່ນໍາເອົາຜົນສຳເລັດໃໝ່ໃຫ່ຍຫລວງກວ່າເກົ່າ ແລະ ຄວາມຢູ່ເຢັນເປັນສຸກມາສູ່ປວງຊົນລາວທັງຊາດດ້ວຍເທີ້ນ.

ສະບາຍດີປີໃໝ່ ຂໍຂອບໃຈ