Laoembassy.com

ພີ່ນ້ອງຮ່ວມຊາດທີ່ຮັກແພງທັງຫລາຍ.

ໃນໂອກາດສົ່ງທ້າຍປີເກົ່າປີຊວດ ແລະຕ້ອນຮັບປີໃໝ່ປີສະຫລຸພສ 2564 ຂ້າພະເຈົ້າຂໍຖືໂອກາດອັນເລີກງາມຍາມດີ ວັນທີ່ເປັນມຸງຄຸນນີ້ສົ່ງຄຳອວຍພອນອັນປະ ເສີດມາຍັງພີ່ນ້ອງຮ່ວມຊາດ ຕະຫລອດເຖິງພີ່ນນ້ອງເຊື້ອຊາດລາວທີ່ອາໃສຢູ່ຕ່າງປະເທດ ກໍ່ຄືຊາວຕ່າງປະ ເທດທີ່ກຳລັງປະຕິບັດໜ້າທີ່ ແລະທຳມາຫາກິນຢູ່ ສປປລາວ ຂໍໃຫ້ທຸກໆທ່ານປາສະຈາກໂລກໄພໄຂ້ ເຈັບ, ປອດໄພຈາກພະຍາດໂຄວິດ19 ມີພາລະນາໄມສົມບູນ ສຸກກາຍສຸກໃຈ ແລະມີຄວາມຈະເລີນກ້າວໜ້າທຸກປະການ.

ພີ່ນ້ອງຮ່ວມຊາດທີ່ຮັກແພງທັງຫລາຍ ໃນປີເກົ່າ ພສ 2563 ທີ່ພວມຜ່ານພົ້ນໄປນັ້ນ ເວົ້າລວມແລ້ວກໍ່ເປັນອີກປີໜື່ງແຫ່ງຄວາມພະຍາຍາມບຸກບືນຂອງທົ່ວພັກທົ່ວລັດ ແລະທົ່ວປວງຊົນລາວທັງຊາດໃນການອອກເຫື່ອເທແຮງສຸມກຳລັງຂອງຕົນເຂົ້າໃນການພັດທະນາ, ສ້າງສາປະເທດຊາດອັນແສນຮັກຂອງພວກເຮົາຢ່າງເປັນຂະບວນຟົດຟື້ນຢ່າງສະເໝີມາ, ເຫດການທີ່ພົ້ນເດັ່ນກວ່າໝູ່ແມ່ນທົ່ວພັກ ທົ່ວລັດ ແລະທົ່ວປວງຊົນລາວໄດ້ເຂົ້າຮ່ວມການກຽມໃຫ້ແກ່ການດຳເນີນກອງປະຊຸມໃຫ່ຍຄັ້ງທີ 11 ຂອງພັກ

ຈາກນັ້ນປວງຊົນລາວທັງຊາດ ຜູ້ທີ່ມີສິດຕາມລັດຖະທຳມະນູນ ແລະກົດໝາຍໄດ້ພ້ອມພຽງຮຽງໜ້າກັນອອກໃຊ້ສິດຂອງຕົນໃນການປ່ອນບັດເລືອກຕັ້ງເອົາສະມາຊິກສະພາແຫ່ງຊາດຊຸດທີ 9 ແລະສະມາ ຊິກສະພາປະຊາຊົນຂັ້ນແຂວງຊຸດທີ 2 ຊື່ງຜົນສໍາເລັດຂອງການເລືອກຕັ້ງດັ່ງກ່າວໄດ້ສືບຕໍ່ຍົກສູງ ແລະເສີມຂະຫຍາຍສິດປະຊາທິປະໄຕ, ສິດເປັນເຈົ້າຂອງປະຊາຊົນລາວບັນດາເຜົ່າຢ່າງເຕັມສ່ວນ ຕໍ່ຈາກນັ້ນສະພາແຫ່ງຊາດກໍ່ໄດ້ເປີດກອງປະຊຸມຄັ້ງປະຖົມມະລືກຂອງຕົນ ແລະໄດ້ສຳເລັດລົງຢ່າງຈົບງາມ ໂດຍມີການຕົກລົງຮັບຮອງເອົາບັນດາເນື້ອໃນທີ່ສຳຄັນຂອງຊາດເຮົາ,

ເຫດການດັ່ງກ່າວໄດ້ສະແດງໃຫ້ເຫັນຄວາມເຕີບໃຫ່ຍຂະຫຍາຍຕົວຂອງປະເທດເຮົາໃນການຍົກລະດັບສະຕິຕື່ນຕົວທາງການເມືອງ, ນໍ້າໃຈຮັກຊາດ ແລະນໍ້າໃຈແຫ່ງຄວາມສາມັກຄີເປັນປຶກແຜ່ນພາຍໃນຊາດ ສະແດງເຖິງຄວາມເຊື່ອໝັ້ນ ແລະ ຄວາມໄວ້ວາງໃຈຂອງປະຊາຊົນລາວບັນດາເຜົ່າ ຕໍ່ການນໍາພາຂອງພັກ, ລັດ ແລະ ຕໍ່ລະບອບປະຊາທິ ປະໄຕ ປະຊາຊົນຂອງພວກເຮົາ.

ພີ່ນ້ອງຮ່ວມຊາດທີ່ຮັກແພງທັງຫລາຍ. ເຖິງວ່າປີຜ່ານມາປະເທດເຮົາຈະປະເຊີນໜ້າກັບຄວາມຫຍຸ້ງຍາກ ແລະສີ່ງທ້າທາຍຫລາຍຢ່າງທີ່ກະທົບໃສ່ປະເທດຂອງພວກເຮົາກໍ່ຕາມ

ແຕ່ພາຍໃຕ້ການຊີ້ນໍາໆພາຂອງພັກ, ລັດ ແລະການປະກອບສ່ວນອັນຕັ້ງໜ້າຂອງປະຊາຊົນລາວໃນທົ່ວປະເທດ ພວກເຮົາມີຄວາມພາກພູມໃຈທີ່ເຫັນວ່າ ປະເທດລາວສາມາດປະຕິບັດຄາດໝາຍສູ້ຊົນຂອງແຜນພັດທະນາເສດຖະກິດ-ສັງຄົມທີ່ວາງໄວ້ ດ້ວຍຜົນສຳເລັດທີ່ສຳຄັນຈໍານວນບໍ່ໜ້ອຍ ເປັນຕົ້ນປະເທດເຮົາສືບຕໍ່ມີສະເຖ່ຍລະພາບທາງການເມືອງ, ມີຄວາມສະຫງົບຮຽບຮ້ອຍທາງສັງຄົມ, ເສດຖະກິດມີການຂະຫາຍຕົວຢ່າງຕໍ່ເນື່ອງ, ວັດທະນາທຳສັງຄົມໄດ້ຮັບການພັດທະນາຢ່າງເປັນລໍາດັບ, ລະບົບການເມືອງການປົກຄອງໄດ້ຮັບການປັບປຸງໃຫ້ມີຄວາມໜັກແໜ້ນເຂັ້ມແຂງກວ່າເກົ່າ, ປະຊາຊົນລາວເຮົາມີຄວາມສາ ມັກຄີປອງດອງ, ຊີວິດການເປັນຢູ່ທາງດ້ານວັດຖຸ ແລະຈິດໃຈຂອງປະຊາຊົນກໍ່ໄດ້ຮັບການປັບປຸງແກ້ໄຂໃຫ້ດີຂື້ນຢ່າງບໍ່ຢຸດຢັ້ງ ເກີດມີຄອບຄົວຕົວແບບທີ່ພົ້ນທຸກນັບມື້ນັບຫລາຍ, ການພົວພັນຮ່ວມມືກັບຕ່າງປະເທດ ແລະອົງການຈັດຕັ້ງສາກົນສືບຕໍ່ໄດ້ຮັບການເສີມຂະຫຍາຍຢ່າງມີປະສິດທິຜົນ ແລະຖານະບົດບາດອິດທິພົນຂອງ ສປປລາວ ໄດ້ຮັບການຍົກສູງຂື້ນໃນເວທີພາກພື້ນ ແລະສາກົນ

ນະໂອກາດອັນເລີກງາມຍາມດີ ແລະ ເປັນສິຣິມຸງຄຸນນີ້ ຂ້າພະເຈົ້າຕາງໜ້າໃຫ້ຄະນະບໍລິຫານງານສູນກາງພັກ ລັດຖະບານ ແລະໃນນາມສ່ວນຕົວ ຂໍສະແດງຄວາມຍ້ອງຍໍຊົມເຊີຍ ແລະ ຂອບອົກຂອບໃຈຢ່າງຈິງໃຈມາຍັງສະມາຊິກພັກ, ພະນັກງານ, ທະຫານຕໍາຫລວດ, ແພດໝໍ, ຄູອາຈານ, ນັກທຸລະກິດ, ຜູ້ກອບການ ຕະຫລອດເຖິງ ພີ່ນ້ອງຮ່ວມຊາດທຸກທົ່ວໜ້າ, ພີ່ນ້ອງເຊື້ອຊາດລາວທີ່ຢູ່ຕ່າງປະເທດ ລວມທັງບັນດາປະເທດເພື່ອນມິດ, ອົງການຈັດຕັ້ງສາກົນທີ່ໄດ້ປະກອບສ່ວນເຂົ້າໃນພາລະກິດລວມຂອງຊາດເຮົາໃນແຕ່ລະດ້ານຢ່າງຕັ້ງໜ້າ ໂດຍສະເພາະໃນສະໜາມຮົບຕໍ່ສູ້ອັນດຸເດືອດຂອງການປ້ອງກັນສະກັດກັ້ນ ຕ້ານ ແລະແກ້ໄຂພະຍາດໂຄວິດ19 ຈົນເຮັດໃຫ້ປະເທດເຮົາມີຜູ້ຕິດເຊື້ອສະສົມຈໍານວນຈໍາກັດ ແລະບໍ່ທັນມີຜູ້ເສຍຊີວິດ.

ພີ່ນ້ອງຮ່ວມຊາດທີ່ຮັກແພງທັງຫລາຍ. ປີສະຫລຸປີ 2564 ທີ່ພວມກ້າວເຂົ້າມາເປັນປີທີ່ມີຄວາມໝາຍສຳຄັນສຳລັບ ສປປລາວ ຊື່ງພວມເຮົາຈະໄດ້ພ້ອມກັນສຸມໃສ່ຈັດຕັ້ງຜັນຂະຫຍາຍໜ້າທີ່ວຽກງານຫລາຍຢ່າງທີ່ສຳຄັນຂອງພັກ ແລະຂອງຊາດ, ແກ້ໄຂຄວາມທຸກຍາກຂອງປະຊາຊົນ ໄດ້ຈັດຕັ້ງປະຕິບັດເປົ້າໝາຍສູ້ຊົນພັດທະນາປະເທດເຮົາໃຫ້ພົ້ນອອກຈາກສະຖານະພາບດ້ອຍພັດທະນາ ເພື່ອກ້າວໄປສູ່ບາດກ້າວຕໍ່ໄປທີ່ໜັກແໜ້ນ, ພັດທະນາຕາມທິດສີຂຽວ ແລະຍືນຍົງແຕ່ນີ້ເຖິງປີ 2030

ເພື່ອໃຫ້ບັນລຸເປົ້າໝາຍດັ່ງກ່າວປະຊາຊົນລາວໃນທົ່ວປະເທດ ຕ້ອງໄດ້ພ້ອມກັບພັກ ແລະລັດເຮົາ ຮ່ວມແຮງຮ່ວມໃຈກັນອອກແຮງສູ້ຊົນ, ຈັດຕັ້ງປະຕິບັດແນວທາງນະໂຍບາຍທີ່ກອງປະຊຸມໃຫ່ຍຄັ້ງທີ 11 ຂອງພັກ ແລະແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ຂອງລັດໃຫ້ປະກົດຜົນເປັນຈິງ ສ້າງວິຖີຊີວິດໃໝ່, ສ້າງການຫັນປ່ຽນໃໝ່ໃນການທຳມາຫາກິນ, ການດຳລົງຊີວິດທີ່ກ້າວໜ້າທັນສະໄໝຂື້ນ ກຳຈັດປັດເປົ່າສີ່ງຫຍໍ້ທໍ້ໃນສັງຄົມເຮົາໃຫ້ກາຍເປັນສັງຄົມທີ່ປອດໃສ, ສະອາດ, ຈົບງາມ ເປັນສັງຄົມີ່ທໂອບເອື້ອອາລີ, ຍຸຕິທຳ ແລະ ສີວິໄລ ຕາມມູນເຊື້ອອັນດີງາມຂອງຊາດ ທັງໃຫ້ມີຄວາມປະດິດສ້າງ ແລະກ້າວໜ້າທັນຍຸກທັນເຫດການອີກດ້ວຍ.

ພີ່ນ້ອງຮ່ວມຊາດທີ່ຮັກແພງທັງຫລາຍ! ກ້າວເຂົ້າສູ່ປີໃໝ່ປີສະຫລຸ ພສ 2564 ນີ້ ຂໍຖືໂອກາດທີ່ເປັນມຸງຄຸນ ແລະເລີກງາມຍາມດີນີ້ ຂ້າພະເຈົ້າຮຽກຮ້ອງມາຍັງພີ່ນ້ອງຮ່ວມຊາດ ຈົ່ງພ້ອມກັນຮັກສາ ແລະເສີມຂະຫຍາຍມູນເຊື້ອອັນດີງາມຂອງຊາດເຮົາ ເພີ່ມທະວີຄວາມສາມັກຄີອັນເປັນປຶກແຜ່ນແໜ້ນໜາ

ພ້ອມກັນຜ່ານຜາຄວາມຫຍຸ້ງຍາກ ແລະສີ່ງທ້າທາຍທົດສອບນາໆປະການທີ່ຈະເກີດຂື້ນໃນປີທີ່ຈະມາເຖິງນີ້ ພ້ອມພາກັນສ້າງສາພັດທະນາປະເທດເຮົາໃຫ້ກ້າວໜ້າຈະເລີນຂື້ນຢ່າງບໍ່ຢຸດຢັ້ງ ພ້ອມກັນນີ້ຂ້າ ພະເຈົ້າຂໍຝາກຄວາມຄິດເຖິງພີ່ນ້ອງເຊື້ອຊາດລາວຢູ່ຕ່າງປະເທດ ຈົ່ງພ້ອມກັນອວຍໜ້າມາຫາປະເທດທີ່ເປັນບ້ານເກີດຂອງເຊື້ອເຜົ່າພົງພັນຂອງຕົນ ເພື່ອຮ່ວມກັບປະຊາຊົນຢູ່ພາຍໃນປະເທດ ສ້າງສາ ແລະພັດ ທະນາປະເທດຊາດອັນແສນຮັກຂອງພວກເຮົາໃຫ້ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ ມີປະຊາທິປະໄຕ ຍຸຕິທຳ ແລະສີວິໄລຍີ່ງໆຂື້ນ

ໃນໂອກາດນີ້ຂ້າພະເຈົ້າຂໍອວຍພອນໃຫ້ຊາວຕ່າງປະເທດ ແລະຊາວຕ່າງດ້າວທີ່ກຳລັງດຳລົງຊີວິດຢູ່ ສປປລາວ ຈົ່ງມີຄວາມສຸກ ມີຄວາມຈະເລີນຕະຫລອດປີໃໝ່ ພສ 2564 ນີ້ ທ້າຍສຸດນີ້ຂໍອວຍພອນໃຫ້ປີໃໝ່ປີສະຫລຸ ພສ 2564 ຈົ່ງເປັນປີທີ່ນໍາເອົາຜົນສຳເລັດໃໝ່ໃຫ່ຍຫລວງກວ່າເກົ່າ ແລະ ຄວາມຢູ່ເຢັນເປັນສຸກມາສູ່ປວງຊົນລາວທັງຊາດດ້ວຍເທີ້ນ.

ສະບາຍດີປີໃໝ່ ຂໍຂອບໃຈ

ໃນວັນທີ 20 ມັງກອນ 2021, ພະນະ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄດ້ສົ່ງສານອວຍພອນ ເຖິງ ພະນະທ່ານ ໂຈ ໄບເດັນ ເນື່ອງໃນໂອກາດເຂົ້າຮັບຕຳແໜ່ງປະທານາທິບໍດີສ.ອາເມລິກາ ຄົນ ທີ 46 ຢ່າງເປັນທາງການ ແລະ ໄດ້ສະແດງຄວາມຊົມເຊີຍ ຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງຕະຫຼອດໄລຍະ 65 ປີ.

ລາຍລະອຽດຂອງສານອວຍພອນ ທ່ານ ໄບເດັນ ຢູ່ທີ່ນີ້

Read Full Document here

ກ່ອນຈະເຂົ້າພິທີທາງການ, ຜູ້ເຂົ້າຮ່ວມຊຸມນຸມ ໄດ້ຮັບຊົມການສະແດງສິນລະປະ ຈາກຄະນະຕ່າງໆ, ຊຶ່ງການສະແດງດັ່ງກ່າວ ລ້ວນແຕ່ມີເນື້ອໃນສ່ອງແສງເຖິງໝາກຜົນ ແຫ່ງການນຳພາອັນສະຫຼາດສ່ອງໃສ ແລະ ມີໄຫວພິບ ຂອງພັກປະຊາຊົນ ປະຕິວັດລາວ ໃນແຕ່ລະໄລຍະ ໂດຍສະເພາະ ໄລຍະປົກປັກຮັກສາ ແລະ ສ້າງສາພັດທະນາປະເທດ ເປັນຕົ້ນ ຜົນສຳເລັດ ກໍ່ຄື ການເຕີບໃຫຍ່ຂະຫຍາຍຕົວທາງດ້ານຕ່າງໆ ໃນການພັດທະນາເສດຖະກິດ-ສັງຄົມ, ລວມທັງ ແບບຢ່າງອັນດີງາມ, ຄຸນສົມບັດສິນທຳປະຕິວັດ, ແບບແຜນນຳພາ-ວິທີເຮັດວຽກ ແລະ ແບບແຜນດຳລົງຊີວິດ ຂອງປະທານ ໄກສອນ ພົມວິຫານ.

ສຳລັບພິທີທາງການ, ໄດ້ຮັບຟັງການກ່າວສູນທອນພົດ ສະເຫຼີມສະຫຼອງວັນຊາດ ຄົບຮອບ 45 ປີ ແລະ ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 100 ປີ ຈາກທ່ານ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ, ຊຶ່ງເນື້ອໃນຂອງສູນທອນພົດ ໄດ້ຍົກໃຫ້ເຫັນ ຄວາມໝາຍຄວາມສຳຄັນ ຂອງວັນຊາດ ທີ 2 ທັນວາ, ຊຶ່ງປະທານ ໄກສອນ ພົມວິຫານ ໄດ້ຢືນຢັນຕະຫຼອດວ່າ “ວັນທີ 2 ທັນວາ ເປັນວັນໄຊຊະນະປະຫວັດການ ທີ່ມີຄວາມໝາຍຍຸກສະໄໝ ອັນເລິກເຊິ່ງ, ເປັນໝາກຜົນລວມຍອດ ແຫ່ງການຕໍ່ສູ້ປະຕິວັດ ທີ່ເຕັມໄປດ້ວຍຄວາມເສຍສະຫຼະ, ຄວາມທຸກຍາກລຳບາກ ຕະຫຼອດຫຼາຍສິບປີ ຂອງປະຊາຊົນເຮົາ ພາຍໃຕ້ການນຳພາ ຂອງພັກກອມມູນິດອິນດູຈີນ ໃນເມື່ອກ່ອນ ແລະ ພັກປະຊາຊົນປະຕິວັດລາວ ໃນປັດຈຸບັນ”. ພ້ອມກັນນັ້ນ ກໍ່ໄດ້ຍົກໃຫ້ເຫັນໝາກຜົນແຫ່ງການນໍາພາຂອງພັກ ແລະ ການເຕີບໃຫຍ່ຂະຫຍາຍຕົວ ຂອງ ສປປ ລາວ ຕະຫຼອດໄລຍະ 45 ປີ ແລະ 30 ກວ່າປີ ແຫ່ງການປະຕິບັດແນວທາງປ່ຽນແປງໃໝ່ຮອບດ້ານ ແລະ ມີຫຼັກການຂອງພັກ, ລວມທັງ ບົດຮຽນຈຳນວນໜຶ່ງ ທີ່ພັກເຮົາສາມາດສະຫຼຸບໄດ້ ແລະ ລະບຸໄວ້ ໃນມະຕິກອງປະຊຸມໃຫຍ່ ຄັ້ງທີ X ຂອງພັກຜ່ານມາ. ໃນນັ້ນ ຜົນສຳເລັດອັນພົ້ນເດັ່ນ ແມ່ນສາມາດຮັກສາໝາກຜົນຂອງການປະຕິວັດ ກໍ່ຄືອຳນາດ, ອະທິປະໄຕ, ເຂດນໍ້າແດນດິນອັນຄົບຖ້ວນ ຂອງປະເທດຊາດ ໄວ້ຢ່າງໝັ້ນຄົງ, ຮັບປະກັນສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍ ແລະ ສະຫງົບປອດໄປ ຂອງສັງຄົມ; ເສດຖະກິດ ມີການຂະຫຍາຍຕົວ ໄປຕາມທິດທີ່ກຳນົດໄວ້, ລາຍຮັບສະເລ່ຍໃສ່ຫົວຄົນ ໄດ້ 2.664 ໂດລາສະຫະລັດ;  ໂຄງລ່າງພື້ນຖານໄດ້ຮັບການພັດທະນາ ສາມາດປົດປ່ອຍ ປະ ເທດເຮົາ ທີ່ເປັນປະເທດ ບໍ່ມີຊາຍແດນ ຕິດຈອດກັບທະເລ ກາຍເປັນປະເທດ ເຊື່ອມຈອດ-ເຊື່ອມໂຍງ ກັບ ປະເທດເພື່ອນບ້ານ   ແລະ ສາກົນ; ສັງຄົມ ໄດ້ຮັບການປັບປຸງ ແລະ ພັດທະນາ ທັງປະລິມານ ແລະ ຄຸນນະພາບດີຂຶ້ນຢ່າງຕໍ່ເນື່ອງ ໂດຍສະເພາະ ຄຸນນະພາບການສຶກສາ, ສາທາລະນະສຸກ, ສີມືແຮງງານ, ການພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງປະຊາຊົນ ເຮັດໃຫ້ຊີວິດການເປັນຢູ່ ຂອງປະຊາຊົນບັນດາເຜົ່າ ໂດຍລວມໄດ້ຮັບການປັບປຸງ, ຍົກລະດັບດີ ຂຶ້ນ ທັງທາງດ້ານວັດຖຸ ແລະ ຈິດໃຈ; ວັດທະນະທຳ ແລະ ຮີດຄອງປະເພນີອັນດີງາມຂອງຊາດ ໄດ້ຮັບການອະນຸລັກຮັກສາ ແລະ ເສີມຂະຫຍາຍ ໃຫ້ອຸດົມຮັ່ງມີ ຊຶ່ງອັນເອກອ້າງທະນົງໃຈ ແມ່ນເມືອງຫຼວງພະບາງ, ວັດພູຈຳປາສັກ, ໄຫຫີນຊຽງຂວາງ ແລະ ສຽງແຄນ ໄດ້ຮັບການຂຶ້ນທະບຽນເປັນມໍລະດົກໂລກ ທາງດ້ານວັດທະນະທຳ; ການຄຸ້ມຄອງລັດ-ຄຸ້ມຄອງສັງຄົມ ແມ່ນໄດ້ຮັບການຄຸ້ມຄອງດ້ວຍກົດໝາຍ, ທັງມີຄວາມສະເໝີພາບ, ມີຄວາມເຂັ້ມງວດ ແລະ ສັກສິດຫຼາຍຂຶ້ນເປັນກ້າວໆ, ຮອດປະຈຸບັນ ໄດ້ປະກາດໃຊ້ກົດໝາຍແລ້ວ 152 ສະບັບ; ມີການພົວພັນການທູດກັບ 143 ປະເທດ, ພົວພັນກັບ 139 ພັກການເມືອງ, ຖານະບົດບາດ ແລະ ຊື່ສຽງ ຂອງ ສປປ ລາວ ໄດ້ຮັບການເຊີດຊູຂຶ້ນ ໃນເວທີພາກພື້ນ ແລະ ສາກົນ.

ເພື່ອສືບຕໍ່ບູລະນະລະບອບປະຊາທິປະໄຕປະຊາຊົນ, ແກ້ໄຂຄວາມຫຍຸ້ງຍາກ ແລະ ສິ່ງທ້າທາຍຕ່າງໆ ທີ່ກຳລັງປະເຊີນ, ທ່ານ ປະທານປະເທດ ໄດ້ເນັ້ນໜັກໃຫ້ພວກເຮົາ ຕ້ອງໄດ້ເພີ່ມເຕີມ ແລະ ເສີມຂະຫຍາຍໝາກຜົນຂອງການປະຕິວັດ ແລະ ບົດຮຽນຕ່າງໆ ທີ່ສະສົມໄດ້ ໃນໄລຍະຜ່ານມາ ໃຫ້ເຂົ້າສູ່ລວງເລິກກວ່າເກົ່າ, ພ້ອມນັ້ນ ກໍ່ຕ້ອງເພີ່ມທະວີ ການນຳພາ-ຊີ້ນຳ ທີ່ເປັນເອກະພາບ, ເປັນເຈົ້າການ ແລະ ປະດິດສ້າງ ຂອງຄະນະພັກແຕ່ລະຂັ້ນ ເຂົ້າໃນການກະກຽມ ແລະ ດຳເນີນກອງປະຊຸມໃຫຍ່ ຄັ້ງທີ XI ຂອງພັກ ໃຫ້ໄດ້ຮັບຜົນສຳເລັດ ຢ່າງຈົບງາມ. ນອກຈາກນັ້ນ ກໍ່ເນັ້ນໜັກ ໃຫ້ເອົາໃຈໃສ່ບາງບັນຫາຕື່ມ ເປັນຕົ້ນ ສືບຕໍ່ປັບປຸງລະບົບການຈັດຕັ້ງ ແຕ່ລະຂັ້ນ ໃຫ້ເຂັ້ມແຂງ ແລະ ມີປະສິດທິພາບ ຕາມທິດກະທັດຮັດ, ຮັດກຸມ, ຈະແຈ້ງ, ປະຢັດ…; ເສີມຂະຫຍາຍທຸກຄວາມສາມາດ ແລະ ທ່າແຮງບົ່ມຊ້ອນ ສ້າງຖານການຜະລິດ ແລະ ບໍລິການ ໃຫ້ເຂັ້ມແຂງ, ຮັບປະກັນ ການພັດທະນາແບບຍືນຍົງ ແລະ ເປັນເຈົ້າຕົນເອງ; ພັດທະນາຊັບພະຍາກອນມະນຸດ ຢ່າງແຂງແຮງ, ສ້າງສັງຄົມ ທີ່ປະຊາຊົນເປັນເຈົ້າ, ມີປະຊາທິປະໄຕ, ສະເໝີພາບ ແລະ ຍຸຕິທຳ; ຕັ້ງໜ້າປະຕິບັດແນວທາງຍຸດທະສາດ ປ້ອງກັນຊາດ, ປ້ອງກັນຄວາມສະຫງົບ ທົ່ວປວງຊົນຮອບດ້ານ, ຮັບປະກັນຄວາມເຂັ້ມ ແຂງດ້ານການຈັດຕັ້ງ ແລະ ຄວາມສາມາດດ້ານວິຊາສະເພາະ; ເຕົ້າໂຮມກຳລັງແຮງທົ່ວສັງຄົມ ເພື່ອພັດທະນາເສດຖະ ກິດ-ສັງຄົມ ໃຫ້ເຂັ້ມແຂງ; ເພີ່ມທະວີການປັບປຸງ ພັກ-ພະນັກງານ ຕາມທິດ ກໍ່ສ້າງພັກປອດໃສ, ເຂັ້ມແຂງ ແລະ ໜັກ   ແໜ້ນ; ຕັ້ງໜ້າຮໍ່າຮຽນເອົາແບບຢ່າງອັນດີງາມ, ຄຸນທາດການເມືອງ, ຄຸນສົມບັດສິນທຳປະຕິວັດ, ແບບແຜນນຳພາ-ວິທີເຮັດວຽກ ແລະ ແບບແຜນດຳລົງຊີວິດ ຂອງປະທານ ໄກສອນ ພົມວິຫານ ໂດຍຕື່ນຕົວປະຕິບັດ ຢ່າງເປັນເຈົ້າການ; ເພີ່ມທະວີປະຕິບັດ ແນວທາງການຕ່າງປະເທດຂອງພັກເຮົາ ເພື່ອສ້າງເງື່ອນໄຂສະດວກ ແລະ ນຳຜົນປະໂຫຍດຕົວຈິງ ໃຫ້ແກ່ການພັດທະນາປະເທດຊາດ ແລະ ປະກອບສ່ວນ ຢ່າງສົມກຽດ ຂອງ ສປປ ລາວ ເຂົ້າໃນພາລະກິດລວມ ຂອງສາກົນ ເພື່ອເສີມສ້າງສັນຕິພາບ, ມິດຕະພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາ ຢູ່ໃນໂລກ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ

ໃນຕອນບ່າຍຂອງວັນທີ 30 ພະຈິກ 2020, ທີ່ສະຖານເອກອັຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ ນະຄອນຫຼວງວໍຊິງຕັນ, ດີຊີ, ສ.ອາເມລິກາ, ທ່ານ ຄຳພັນ ອັ່ນລາວັນ ໄດ້ຍື່ນສານ ຕາຕັ້ງຂອງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແບບທາງໄກຕໍ່ ພະນະທ່ານ ນາງຈູລີ ປາເຢັດ (Julie Payette) ຜູ້ສໍາເລັດຣາຊະການ ແລະ ຜູ້ບັນຊາການທະຫານສູງສຸດ ແຫ່ງ ການາດາ ເພື່ອດຳລົງຕຳແໜ່ງເປັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ການາດາ, ເຊິ່ງມີສຳນັກງານຕັ້ງຢູ່ນະຄອນຫຼວງ ວໍຊິງຕັນ, ດີຊີ, ສ. ອາເມລິກາ.

ໃນໂອກາດດັ່ງກ່າວ, ທ່ານເອກອັກຄະລັດຖະທູດ ໄດ້ສົ່ງຄຳປາຖະໜາດີ ແລະ ພອນໄຊອັນປະເສີດ ຂອງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ເຖິງ ພະນະທ່ານ ນາງ Julie Payette ແລະ ຜ່ານພະນະທ່ານ ໄປຍັງລັດຖະບານ ແລະ ປະຊາຊົນການາດາທຸກທົ່ວໜ້າ. ທ່ານທູດ ໄດ້ຖືເປັນກຽດ ແລະ ຕີລາຄາສູງ ຕໍ່ການພົວພັນ ລາວ-ການາດາ ມີການຂະຫຍາຍຕົວຢ່າງຕໍ່ເນື່ອງ ນັບຕັ້ງແຕ່ສອງປະເທດໄດ້ສ້າງສາຍພົວພັນການທູດຮ່ວມກັນ ໃນປີ 1954 ເປັນຕົົົ້ນມາ, ເຊິ່ງທັງສອງຝ່າຍ ກໍໄດ້ມີຄວາມພະຍາຍາມຊອກຊ່ອງທາງ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນມີໝາກຜົນ ລະຫວ່າງ ສອງປະເທດໃຫ້ມີບາດກ້າວຂະຫຍາຍຕົວ, ນຳເອົາຜົນປະໂຫຍດໃຫ້ແກ່ສອງປະເທດກໍຄືປະຊາຊົນລາວ ແລະ ການາດາ.

ໃນໂອກາດດຽວກັນ, ທ່ານເອກອັກຄະລັດຖະທູດ ກໍໄດ້ສະແດງຄວາມຂອບໃຈ ແລະ ຊົມເຊີຍຕໍ່ການຮ່ວມມືສອງຝ່າຍ, ເຊິ່ງເຫັນວ່າມີຄຸນຄ່າຢ່າງຍິ່ງ ໂດຍສະເພາະການປະກອບສວ່ນ ຊ່ວຍເຫຼືອດ້ານທຶນຮອນເຂົ້າໂຄງການເກັບກູ້ລະເບີດທີ່ບໍ່ທັນແຕກໃນປາງສົງຄາມ (UXO), ເຊິ່ງເປັນອຸປະສັກໃຫ້ແກ່ການພັດທະນາເສດຖະກິດສັງຄົມຂອງ ສປປ ລາວ ເປັນຕົ້ນ ແມ່ນດ້ານສາທາລະນະສຸກ, ພະລັງງານ, ການສຶກສາ, ການປະຕິບັດດ້ານກົດໝາຍ ແລະ ອື່ນໆ ທີ່ໃຫ້ການຮ່ວມມື ແລະ ຊ່ວຍເຫຼືອທີ່ດີ ຊຶ່ງໄດ້ປະກອບສ່ວນເຂົ້າໃນການພັດທະນາເສດຖະກິດ – ສັງຄົມແຫ່ງຊາດຂອງລາວ ແລະ ຫວັງວ່າ ການາດາ ຈະສືບຕໍ່ສະໜັບສະໜູນ ສປປ ລາວ ໃຫ້ບັນລຸເປົ້າໝາຍການພັດທະນາແບບຍືນຍົງ ພ້ອມທັງການຕໍ່ສູ້ຕ້ານກັບການລະບາດຂອງໂຄວິດ–19 ແລະ ການຟື້ນຕົວຂອງເສດຖະກິດຫຼັງ ໂຄວິດ–19.

ໃນໂອກາດດັ່ງກ່າວ, ພະນະທ່ານ ນາງ Julie Payette ກໍໄດ້ສະແດງຄວາມຍິນດີ ແລະ ຊົມເຊີຍ ທ່ານ ຄຳພັນ    ອັ່ນລາວັນ ໃນການດໍາລົງຕໍາແໜ່ງເປັນເອກອັກຄະລັດຖະທູດ ສປປ ລາວ ຄົນໃໝ່ ປະຈຳ ການາດາ ແລະ ໄດ້ສະແດງຄວາມຂອບໃຈຕໍ່ ຄໍາອວຍພອນອັນອົບອຸ່ນຂອງ ພະນະທ່ານ ປະທານປະເທດ ແຫ່ງ ສປປ ລາວ ພ້ອມທັງໄດ້ສົ່ງຄຳອວຍພອນອັນອົບອຸ່ນ ແລະ ອວຍພອນໄຊອັນປະເສີດມາຍັງ ພະນະທ່ານ ບຸນຍັງ ວໍລະຈິດ, ປະທານປະເທດ, ລັດຖະບານ ແລະ ປະຊາຊົນລາວທຸກທົ່ວໜ້າ ແລະ ອວຍພອນໃຫ້ທ່ານເອກອັກຄະລັດຖະທູດລາວ ປະຕິບັດໜ້າທີ່ການທູດຂອງຕົນດ້ວຍຜົນສຳເລັດ ໂດຍການສົ່ງເສີມສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ກໍຄື ລະຫວ່າງ ອາຊຽນ ແລະ ການາດາ ໃຫ້ຂະຫຍາຍຕົວຍີ່ງຂຶ້ນໃນຕໍ່ໜ້າ.

ສະຖານທູດລາວທີ່ວໍຊິງຕັນດີຊີສ້າງຂະບວນການຂໍ່ານັບຮັບຕ້ອນວັນສຳຄັນຕ່າງໆຂອງຊາດ

————————————————————————

          ໃນ​ວັນ​ທີ 20 ສິງຫາ 2020, ສາມອົງການຈັດຕັ້ງມະຫາຊົນຂອງສະຖານທູດແຫ່ງ ສປປ ລາວ ທີ່ວໍຊິງຕັນດີຊີໄດ້ສ້າງຂະບວນການອອກແຮງງານລວມ ແລະ ແຂ່ງຂັນກິລາຢູ່ສະຖານທູດ ເພື່ອຂໍ່ານັບຮັບຕ້ອນວັນສຳຄັນຂອງຊາດຄື: ວັນສ້າງຕັ້ງແນວລາວສ້າງຊາດ 13/8/1950 ຄົບຮອບ 70 ປີ, ວັນປະກາດນຳໃຊ້ລັດຖະທຳມະນູນ 15/8/1991 ຄົບຮອບ 29 ປີ ແລະ ວັນຢຶດອຳນາດທົ່ວປະເທດ 23/8/1975 ຄົບຮອບ 45 ປີ. ໃນໂອກາດດັ່ງກ່າວ​ທ່ານ ຄຳ​ພັນ ອັ່ນ​ລາ​ວັນ, ເອກ​ອັກ​ຄະ​ລັດ​ຖະ​ທູດ ແຫ່ງ ສ​ປ​ປ ລາວ ປະ​ຈຳ ສ. ອາ​ເມ​ລິ​ກາ ແລະ ກາ​ນາ​ດາໄດ້ໃຫ້ກຽດເຂົ້າຮ່ວມ, ​ພ້ອມດ້ວຍຄະ​ນະ​ນຳສະຖານທູດ, ພະນັກງານ ແລະ ບັນດາຄອບຄົວພະນັກງານພາຍໃນສະຖານທູດ.  ຂະບວນການອອກແຮງງານ ແລະ ແຂ່ງຂັນກິລາ​ຄັ້ງ​ນີ້ ເປີດ​ຂື້ນ​ໃນ​ທ່າມ​ບັນ​ຍາ​ກາດ​ອັນ​ຟົດ​ຟື້ນ​ມ່ວນ​ຊື່ນ​ທີ່​ທົ່ວ​ພັກ, ທົ່ວ​ກອງທັບ ​ແລະ​ ທົ່ວ​ປວງ​ຊົນ​ລາວບັນ​ດາ​ເຜົ່າ​ໃນ​ທົ່ວ​ປະ​ເທດ ພວມສ້າງຂະບວນການຂໍ່ານັບຮັບຕ້ອນວັນສຳຄັນຕ່າງໆຂອງຊາດລາວເຮົາກໍຄືຂະບວນການແຂ່ງຂັນຮັກຊາດພັດທະນາ.

ໃນພິທີເປີດການສ້າງຂະບວນການໃນຄັ້ງນີ້​ ທ່ານ ຄໍາ​ພັນ ອັ່ນ​ລາ​ວັນ, ໄດ້ກ່າວຄຳເຫັນໂດຍໄດ້ຍົກໃຫ້ເຫັນຄວາມໝາຍຂອງວັນສຳຄັນຂອງ­ຊາດໃນເດືອນ ສິງຫາ 2020 ພ້ອມນີ້ຍັງໄດ້ເໜັ້ນໃຫ້ເຫັນຄວາມໝາຍຄວາມສຳຄັນຂອງການອອກແຮງງານ ເພື່ອສືບສານມູນເຊື້ອອັນດຸໝັ່ນຂະຫຍັນພຽນຂອງປະຊາຊົນລາວທີ່ມີມາແຕ່ດຶກດຳບັນ ແລະ ໃຫ້ພະນັກງານຮັກສາມູນເຊື້ອການອອກແຮງງານ, ທັງຮຽກຮ້ອງ​ໃຫ້​ບັນດາພະນັກງານ ແລະ ຄອບຄົວພະນັກງານທຸກຄົນ​ຍົກສູງ​​ສະ​ຕິລະວັງຕົວຕໍ່ການແພ່ລະບາດຂອງພະຍາດໂຄວິດ-19, ມີ​ຄວາມ​ສາ​ມັກ​ຄີຮັກແພງ, ມີ​ຄວາມ​ເປັນ​ເອ​ກະ​ພາບ, ຕັ້ງ​ຫນ້າ​ສູ້​ຊົນ ບຸກ​ບືນ​ຝຶກ​ຝົນ​ຫຼໍ່​ຫຼອມ​ຕົນ​ເອງ ເພື່ອ​ຄວາມ​ກ້າວ​ຫນ້າ ແລະ ​ຜົນ​ສຳ​ເລັດ​ການ​ປະ​ຕິ​ບັດໜ້າ​ທີ່ວຽກງານຕາມ​ການມອບ​ໝາຍຂອງຂັ້ນເທິງ. ​

     ການສ້າງຂະບວນການຈົບລົງດ້ວຍການມອບລາງວັນໃຫ້ແກ່ທີມຊະນະໃນການແຂ່ງຂັນກິລາ ແລະ ຮ່ວມພາເຂົ້າສາມັກຄີພາຍໃນດ້ວຍບັນຍາກາດອັນເບີກບານມ່ວນຊື່ນ ແລະ ມີຄວາມໝາຍ. (ຈົບຂ່າວ).